Nós Televisión estrea na Coruña o documental “Véndese litoral, A Coruña deféndese”
O audiovisual forma parte da serie Madia Leva, a nova aposta desta canle e Tingaralanga Audiovisual.
Por Galicia Confidencial | A Coruña | 27/09/2018 | Actualizada ás 13:42
O Porto da Coruña e o futuro dos seus terreos é o fio argumental do novo documental de Xosé Bocixa para Nós Televisión dentro do programa Madia leva. A presentación será hoxe xioves 27 de setembro ás 20 horas no Portas Ártabras (rúa Sinagoga, 22).
“O audiovisual relata a historia dun espolio”, apuntan desde Nós TV. “A historia de como os intereses económicos e empresariais priman sobre o espazo público”, engaden. Durante 50 minutos, Xosé Bocixa aborda este tema entrevistando aos principais protagonistas, a veciñanza, xunto aos responsables políticos que quixeron participar.
MADIA LEVA
Este documental enmárcase dentro do programa Madia leva que Nós Televisión creou para dar visibilidade a problemas sociais de actualidade, como son os medioambientais. O primeiro realizouse este mesmo ano e baixo o título “Touro, O Pino. A ameaza do cobre” que se estreou no mes de marzo e que viaxou por toda Galicia ata chegar mesmo a proxectarse en Bos Aires.
