Os galegos gastaron unha media de 1.771 euros este ano en compras online

O gasto medio dos consumidores de Galicia que compraron por internet foi de 1.771 euros durante o último ano, un 3 por cento menos que o exercicio anterior, e un 7 por cento por baixo da media do conxunto estatal.

Os sectores nos que o gasto medio foi máis elevado foron o da alimentación, viaxes e formación. Por riba da media estatal están en gastos de formación, alimentación, lecer e saúde, e beleza.

Así o conclúe o estudo do Observatorio Cetelem e-commerce 2018: 'M-commerce: a (R)evolución da tenda online', realizado por Cetelem, grupo BNP Paribas, relativo a Galicia, que achega información sobre as compras realizadas en internet este ano, tendencias no comercio electrónico, e unha análise de varios sectores de distribución.

Segundo o mesmo, o 57 por cento dos internautas galegos (fronte ao 63 por cento en España), realizou algunha compra online a través do seu dispositivo móbil nos últimos 12 meses, o que supón un incremento de 6 puntos porcentuais respecto ao ano anterior, sendo os produtos máis adquiridos lecer, moda e viaxes.

Os galegos destacan por encima da media estatal nas compras de lecer e moda a través do móbil.

NECESIDADE DE VER E TOCAR O PRODUTO

O máis negativo das compras online para os consumidores de Galicia é, en primeiro lugar, a necesidade de ver e tocar o produto, os gastos de envío non gratuítos e a dificultade para facer devolucións.

No polo oposto, o máis valorado deste tipo de compras é poder efectuar as adquisicións desde a casa, a calquera hora do día e recibir os produtos no domicilio.

FINANCIAMENTO DE ELECTRODOMÉSTICOS

Os galegos destacan por encima da media estatal no financiamento de electrodomésticos (65 por cento fronte ao 55 por cento).

O importe medio financiado é de 1.105 euros para os galegos, un importe 170 euros inferior ao importe medio en España, situado en 1.277 euros.