Feijóo di que os 195 medallistas galegos son unha "inspiración" tras cesar a outra medallista da Xunta

O presidente da Xunta, Alberto Núñez Feijóo, destacou este xoves os valores de 195 medallistas galegos que foron campións en competicións internacionais entre 2017 e 2018 como "inspiración" para os deportistas máis novos.

"Estamos a falar de 353 medallas internacionais, 126 delas de ouro, e de 353 veces nas cales toda Galicia compartiu o orgullo de conseguir todas esas vitorias e de ser os mellores no medio cento de especialidades deportivas", abordou, segundo informa o Goberno galego.

Durante o acto de recepción aos medallistas en Santiago, Feijóo aseverou que, para seguir sumando vitorias, os deportistas contarán co apoio da Xunta.  Ao longo da súa intervención, o presidente do Executivo autonómico enxalzou "o esforzo, a capacidade de superación e os éxitos conseguidos" por todos eles, froito tamén do "traballo e a vocación dos técnicos, dos adestradores, dos clubs, das federacións e das familias que os apoian".

Unhas palabras que contrastan co cese da Secretaría Xeral para o deporte da medallista olímpica Marta Míguez para "enchufar" no seu lugar ao José Ramón Lete Lasa que quedou sen traballo tras a chegada de Pedro Sánchez ao Goberno central. Este cese provocou duras críticas da maior parte das federacións deportivas.

Así mesmo, incidiu en que son o maior incentivo para o deporte base, "porque ademais de levar a bandeira galega polo mundo enteiro, abanderan tamén os valores que a mocidade debe seguir", dixo, ao que engadiu que o fomento do deporte e a actividade física é xa unha "aposta por transformar a sociedade".