Animalistas critican a "conivencia" da Xunta co "lobby procaza" e a falta de transparencia

A Asociación Animalista Libera e a Fundación Franz Weber (FFW) criticaron "a conivencia" da Xunta de Galicia co "lobby procaza" e a negación "sistemática" de datos aos profesionais da comunicación sobre os campionatos.

Nun comunicado conxunto, informaron de que o sábado 26 de xaneiro, os termos municipais de Muros e Carnota (A Coruña) acollerán o campionato autonómico de caza. Os animalistas divulgaron esta información "como exercicio de transparencia fronte á Xunta e o lobby procaza".

Nesta liña, censuraron "as trabas aos medios de comunicación"  por parte do Executivo galego. Libera! e FFW anunciaron que pedirán explicacións no Parlamento de Galicia e á Valedora.

Ademais, avisaron de que esta "nova masacre" se vai realizar a "pouca distancia das marismas de Caldebarcos", na que "segundo a Orde de Vedas de 2018/2019 está prohibido o exercicio da caza", tal e como recordaron na súa nota de prensa. Isto, ao seu parecer, "evidencia que aos seus promotores lles importa moi pouco o potencial impacto negativo" do torneo.

Libera! e FFW expresaron o seu desexo de que "os promotores destas macrobatidas de mamíferos deixen de xogar coa cidadanía e non modifiquen, unha vez máis, o calendario", en alusión á "desaparición" do mesmo da páxina web e ao cambio da data, fixada inicialmente para este domingo.

Para rematar, anunciaron que "tratarán de documentar e monitorizar" a actividade "para supervisar as posibles infraccións" e denuncialas á Consellería de Medio Ambiente, aínda que "as esperanzas neste departamento minguaron logo do seu labor obstrucionista", lamentaron.