O Sindicato de Enfermaría di que "non son subordinados" dos médicos

O Sindicato de Enfermaría (SATSE) advirte de que estes profesionais "non son subordinados de ningún outro colectivo" e de que é "unha profesión autónoma con capacidade de xestión e decisión propia". Así se pronuncia en relación aos grupos de traballo constituídos polo Sergas tras a dimisión dos xefes de servizo de Atención Primaria en Vigo.

Segundo explica a organización, en Atención Primaria traballan coordinados con medicina en equipos multidisciplinares, por iso aseguran mostrarse sorprendidos tras as declaracións de colectivos médicos que "pretenden deixar aos enfermeiros subordinados baixo o mando dunha futura dirección médica".

"A enfermaría é, do mesmo xeito que o resto de colectivos cos que conviven en Atención Primaria, consciente da importancia que ten unha boa coordinación para que os equipos desenvolvan o seu traballo da mellor forma posible", asegura este sindicato.

Con todo, subliña que iso non implica que os profesionais da enfermaría "queden baixo o mando de ningún outro colectivo". "A coordinación entre as dúas direccións é posible, ademais de necesaria", explica.

EXPECTANTES

Ademais, afirma que están expectantes "do que pense facer o Sergas e a Consellería de Sanidade", pero rexeita entrar en disputas corporativas "e moito menos consentir o menosprezo nin de compañeiros doutras profesións que están nos grupos de traballo, nin moito menos o menosprezo institucional do Sergas e a Consellería de Sanidade".

Doutra banda, "con respecto aos supostos novos roles dos profesionais de enfermaría en Atención Primaria", lembra que "precisamente non son novos" xa que forman parte das súas competencias aínda que "sen medios humanos, dificilmente será posible levalas a cabo". Con isto, fai referencia a temas como prevención e/ou educación para a saúde, "que continuarán sen poder desenvolverse".

Por todo iso, espera que "precisamente a administración sanitaria non senta presionada por outros servizos e acepte o inaceptable", o que "non admitirán nunca" unha vez chegue formalmente á Mesa de Sanidade.

"Desde SATSE, resúltanos moi difícil entender e compartir que se estea proxectando unha mellora da Atención Primaria sen contar con enfermaría, a través dunha dirección propia, autónoma pola cantidade de procesos e procedementos que se desenvolven no traballo cotián dos nosos profesionais, os equipos multidisciplinares que precisamente están para acordar a posta en acción e contar con todos os axentes implicados no equipo de saúde", critica.