O Colexio de Avogados de Santiago súmaxe ás queixas ao Goberno central por negar novos xulgados á cidade

O decano dos avogados composteláns, Francisco Rabuñal, asegurou este venres que Santiago "necesita de forma urxente novos xulgados" e reivindicou "a nova sala do social" fronte á decisión do Goberno de non aceptar a proposta do TSXG e Xunta para pór en marcha un cuarto xulgado deste ámbito na capital galega.

Así o dixo Rabuñal durante a súa participación na celebración da festividade de San Raimundo de Peñafort, que nesta ocasión coincide co 175 aniversario do Colexio de Avogados de Santiago.

"175 anos despois, o colexio ten as mesmas reivindicacións, xa que naquel momento xa se falaba da necesidade de dotar á cidade de novos órganos xudiciais e administrativos", dixo Francisco Rabuñal.

No acto deste venres, a residencia de anciáns das Hermanitas da Caridade de San Marcos recibiu o X Premio Dereitos Humanos do Colexio, polo "seu labor constante e desinteresado para mellorar a vida das persoas maiores". Pola súa banda, César Rúa Martínez, Pedro Trepat Silva e José López Fernández recibiron as insignias de Ouro do colexio por cumprir 40 anos no exercicio da avogacía.