Albert Rivera prognostica que o PP perderá "a metade" dos seus votantes

O líder e candidato á Presidencia do Goberno de Ciudadanos, Albert Rivera, de visita en Galicia, chamou a concentrar o voto no seu partido nas próximas eleccións xerais, que terán lugar o 28 de abril. Así, en Vigo, contrapuxo o crecemento desta formación de acordo con algunhas sondaxes fronte á "crise" do Partido Popular", que, segundo apuntou, podería perder "a metade" dos seus votantes.

Rivera apostou por un voto de "unidade" ao redor da formación laranxa ante a chamada ao "voto útil" para o PP por parte do líder deste partido en Galicia e presidenteda Xunta, Alberto Núñez Feijóo.

O presidente de Ciudadanos volveu defender deste xeito o proxecto "liberal" e "centrista" de Ciudadanos, que, segundo asegurou, non pactaría co Partido Nacionalista Vasco (PNV) e que "podería mesmo encabezar un Goberno de España".

Nesta liña, asegurou que os membros da formación laranxa están "cansados" de pactar cos partidos nacionalistas e apostou por un Goberno no que o presidente da Generalitat de Catalunya, Quim Torra, non poida decidir "a política nacional" e no que Podemos non poida influír na "económica".

Ademais, puxo en valor o labor xudicial e dos corpos de seguridade no marco do 1 de outubro e acusou os executivos de Mariano Rajoy e Pedro Sánchez de non explicar á opinión pública europea que o ocorrido nesa data foi un "golpe de Estado".

CANDIDATOS

En relación á inclusión de candidatos independentes nas listas do seu partido, defendeu que non se trata de "fichaxes", senón de "persoas que deron un paso" á fronte.

Así, o presidente de Ciudadanos eloxiou a traxectoria da xornalista Beatriz Pino, cabeza de lista de por Pontevedra ao Congreso, quen o acompañou na súa visita a Vigo, e mostrouse convencido de que a formación laranxa conseguirá varios escanos nas provincias galegas.

Así mesmo, avanzou que "nos próximos días" se tomarán as decisións necesarias para completar as listas electorais tras ser preguntado pola correspondente ao Concello de Vigo. Neste sentido, afirmou que Ciudadanos aspira a "cambiar os gobernos populistas" presentes en distintos municipios galegos.