A Xunta insta o Goberno a que dea "certeza" empresarial ás grandes multinacionais

O conselleiro de Economía, Francisco Conde, instou ao Goberno central a realizar unha "reflexión profunda e integral" das alegacións trasladadas tanto pola Xunta como polos sindicatos ao estatuto de consumidores electrointensivos, co obxectivo de dar "certeza e seguridade" tanto ás empresas como aos investidores "que poidan estar interesados en Alcoa", que quere desfacerse das súas plantas da Coruña e Avilés.

A preguntas dos xornalistas coincidindo cun acto en Santiago, Conde reclamou "un conxunto de medidas que acheguen certidumbre e seguridade" á industria.  Respecto diso, afirmou non ter "ningún tipo de resposta" por parte do Executivo de Pedro Sánchez ás súas alegacións, que, segundo recalcou, "expoñen un conxunto de medidas que permitirían dar unha solución a ese prezo competitivo que precisan Alcoa e o resto das empresas electrointensivas".

"Lamentablemente estamos a esperar a que o Goberno poida expor unha proposta integral", incidiu, antes de valorar que "nestes momentos" do que "se está falando" é "de expectativas, posibles medidas, en calquera caso parciais".

Este mesmo luns, o Goberno central mostrouse aberto a elevar a 200 millóns as compensacións de custos indirectos de CO2. Pero "o que precisan os empresarios, o que precisa Alcoa e o que precisan os investidores que poidan estar interesados son certezas, un prezo eléctrico, un marco estable", segundo insistiu Conde.

Neste sentido, apuntou á redución de peaxes, unha diminución da fiscalidade, mecanismos compensación de CO2 e "categorización" das empresas electrointensivas. Por todo iso, o titular de Economía da Xunta urxiu unha "rectificación" mediante unha "proposta concreta e realista que dea certezas" para que o 30 de xuño "os traballadores de Alcoa poidan dar continuidade aos seus empregos".