Por Europa Press / Redacción | OURENSE | 18/04/2019 | Actualizada ás 14:59
O portavoz de En Marea, Luís Villares, e o candidato ao Congreso pola provincia de Ourense, Iván Olmos, desprazáronse este xoves ata O Barco de Valdeorras para expor o plan industrial que a formación propón para a comarca.
En concreto, Villares responsabilizou ao PP dos "problemas laborais" que obrigaron "á emigración" ante "a falta de oportunidades laborais" nesta zona e á reforma laboral do "empeoramento das condicións laborais das canteiras".
Ao mesmo tempo, criticou a política mineira da Xunta, que causou a "desfeita" das contornas ambientais e derivou na investigación aberta ao director xeral de Minas, Ángel Bernardo Tahoces, do que volveu esixir a dimisión. Fronte a iso, Villares reivindicou o sector mineiro e de cantaría, pero "nunhas coordenadas xustas laboral e ambientalmente".
Así, En Marea propón unhas condicións de traballo "dignas" que sexan compatibles co medio ambiente, "apostando pola restauración ambiental daquelas canteiras que se pechan, un compromiso das empresas e un deber legal". "Isto é unha oportunidade laboral e de reciclaxe de emprego", dixo Villares.
Outra das propostas de En Marea é a de aproveitar a concesión feita polo Parlamento Europeo para a aprobación da ampliación do corredor atlántico ferroviario que pasa polo Barco para facer unha promoción industrial que provoque asentamento de industrias. "En Marea quere pór enriba da mesa un plan industrial para a comarca, algo que está a ser negado polas políticas do Partido Popular", criticou.
Pola súa banda, Iván Olmos culpou o Partido Popular do "despoboamento" da provincia de Ourense. Segundo o candidato "é preciso pór o foco en medidas para revitalizar o rural e combater o despoboamento, que é un do principais problema da provincia".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.