Ana Pontón márcase o reto de estender a Galicia o modelo do BNG en Ribadeo e Muras
Estivo en Xove acompañada polos candidatos de distintos puntos da Mariña.
Por E.P. | LUGO | 12/05/2019 | Actualizada ás 17:46
A portavoz nacional do BNG, Ana Pontón, avogou no seu mitin comarcal na Mariña lucense, celebrado en Xove, por estender a toda Galicia "o modelo municipal de éxito" dos nacionalistas en concellos como Ribadeo e Muras, que situou nas "antípodas" do "desastre especulativo" dos 'populares' en localidades como Barreiros.
No mitin deste domingo, Ana Pontón estivo acompañada dos alcaldes e candidatos á reelección en Ribadeo e Muras, Fernando Suárez e Manuel Requeijo, así como dos candidatos por Viveiro, Barreiros e Xove, Miriam Bermúdez, Ana Hermida e Xosé Manuel López Hermida.
No acto pediu "estender o modelo municipal do BNG" tanto aos concellos da Mariña como a toda Galicia para demostrar que a formación nacionalista é "capaz de facer política municipal con maiúsculas da man dun proxecto sólido, unido, renovado e coa man tendida que transforma en positivo e mellora a vida da veciñanza, desde a honradez, construíndo concellos feministas, ecoloxistas cos que se avanza e prospérase".
Pontón destacou que o reto o 26 de maio é "máis BNG nos concellos, máis concellos gobernados co modelo municipal do BNG, libres de corrupción e de especulación" e "participativos, honestos na xestión, sustentables, con dinamismo económico, social e cultural".
A dirixente nacionalista lembrou que o 26M tamén se elixe representación en Europa e pediu o voto para Ana Miranda, que "foi capaz de converter o escano do BNG no escano de Galicia". Pola súa banda, Miranda reivindicou a eficacia política do BNG en Bruxelas a favor de Galicia fronte ao "deixamento do PP e do PSOE", en temas como o saneamento das rías, a defensa de sectores produtivos ou da preservación do medio ambiente.
