Por E.P. | SANTIAGO DE COMPOSTELA | 20/05/2019 | Actualizada ás 15:04
A presidenta da Deputación de Pontevedra, Carmela Silva, acusou ao presidente da Xunta, Alberto Núñez Feijoo, e ao vicepresidente, Alfonso Rueda, de "mentir en todo o tema da comarcalización de bombeiros".
Nunha rolda de prensa celebrada na Deputación para informar os contidos da xunta de goberno provincial, Carmela Silva dixo que o proxecto de comarcalización dos parques de bombeiros "nunca existiu" máis que nos anuncios do Executivo galego. "Levan un tempo calados, xa non falan diso", comentou. "Coñecen vostedes algunha comarcalización en Lugo, Ourense ou A Coruña? Era todo unha mentira", engadiu.
Carmela Silva foi preguntada polos xornalistas a raíz do incendio nun edificio de Marín que obrigou o pasado fin de semana a desaloxar aos ocupantes de 21 vivendas e ao que tiveron que acudir efectivos do parque municipal de Pontevedra.
A presidenta da Deputación insistiu en que para Núñez Feijoo e Roda a comarcalización "nunca foi unha aposta real" e citou como mostra que "non se reuniron nin co alcalde de Pontevedra nin co de Vigo".
O plan de comarcalización de bombeiros da Xunta é para Carmela Silva "unha cuestión de palabrería que non tiña ningún contido", xa que non dispuña, segundo di, "nin de recursos nin dun estudo serio" ou dotación de recursos humanos necesarios.
A XUNTA "SÓ ESTÁ PREOCUPADA" POR CARMELA SILVA
Finalmente, Carmela Silva indicou que na Xunta de Galicia "non están ocupados nin preocupados co que ocorre nin en Galicia nin na provincia, só están preocupados da presidenta da Deputación de Pontevedra".
En cambio, "non din nin unha palabra" sobre a política industrial, infraestruturas, apoio ao turismo "que é cero" ou das súas iniciativas para resolver a situación "terrible" dos centros educativos ou da atención primaria en sanidade. Entre estes asuntos, a presidenta provincial tamén citou a restauración do Pazo de Lourizán para sinalar que "os xuíces lles van a obrigar porque é a súa obrigación", dixo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.