O goberno socialista de Ferrol apóiase no PP para aprobar todos os puntos do pleno de organización municipal

O pleno de organización do Concello de Ferrol, o primeiro co socialista Ángel Mato na Alcaldía, durou case dúas horas de debate e o goberno local logrou sacar adiante todos os puntos da orde do día co apoio do PP e fronte ás críticas de Ferrol en Común (FeC), liderado polo ex-alcalde Jorge Suárez, e BNG pola repartición das dedicacións dos edís.

Mentres que o goberno local contará con catro dedicacións exclusivas ademais da do rexedor, a oposición repartirase sete parciais: cinco para os populares --grupo maioritario--, unha para FeC e outra para o Bloque.

Ademais, no pleno de organización aprobouse por unanimidade a creación do seis comisións informativas previstas polo goberno. No apartado do persoal eventual votaron en contra Ferrol en Común e BNG, mentres que no apartado da representación do Concello en organismos tan só se abstivo a agrupación do ex-alcalde Jorge Suárez.

O portavoz municipal do PSOE, Julián Reina, destacou que esta repartición de dedicacións se fixo tras "falar con todas as forzas", como tamén defendeu o "criterio de proporcionalidade" ao tomar como referencia os resultados nas pasadas eleccións locais.

Ao mesmo tempo, o socialista quixo comentar que esta nova corporación, ao contar con menos persoal, ao suprimirse o posto da xerente de Urbanismo e o administrativo do grupo municipal de Ciudadanos, custará "21.000 euros menos ao ano que a anterior."

O portavoz municipal do Partido Popular, o ex-alcalde José Manuel Rey Varela, criticou na súa intervención as palabras de Ferrol en Común e BNG nas que afirmaran que ían apoiar o PSOE no goberno municipal, algo que non sucedeu neste pleno. Por tanto, para os populares non é "normal" que o goberno teña oito concelleiros e a oposición conte con dezasete.

"NON SE FALA DOS PROBLEMAS DA CIDADE"

Ao mesmo tempo tamén criticou que 26 días desde a investidura e 46 días desde as eleccións municipais "non se falou nada dos problemas da cidade", polo que tendeu a man ao goberno socialista para "chegar a acordos polo ben da cidade, por enriba de ideoloxías."

O portavoz popular tamén afirmou que Ferrol en Común e BNG o que pretenderon era "buscar a foto dos vinte concelleiros --os 12 do PP e o oito do PSOE-- levantando a man para xustificar as súas irresponsabilidades que non contribúen á cidade".

José Manuel Rey Varela lembrou que esta proposta do goberno socialista "é a mesma que nas dúas anteriores corporacións", polo que neste pleno de organización "non hai noticia" e "non hai ningún pacto". Á súa vez, afirmou que co principio de proporcionalidade o custo das dedicacións por concelleiro do BNG é de "22.000 euros anuais" e o do PP "son 10.000 euros."

"PACTO DE COVARDES"

As críticas chegaron, por unha banda, desde o BNG. O seu portavoz municipal, Iván Rivas, o cal non defendeu este "principio de proporcionalidade", afeou que o goberno socialista "tan só lle preocupen as formas e non o diálogo".

O nacionalista tamén recoñeceu que se sentiu "decepcionado" con este inicio do goberno socialista porque pensaba "que quería ter un camiño diferente", ao mesmo tempo que preguntou: "A cambio de que se produce este apoio do PP?".

Para Iván Rivas, o que se produciu era un "pacto de covardes" e levou a este debate plenario temas que se van ter que levar a debate nesta corporación, como o estado dos servizos públicos do Concello ou o cobro da taxa de saneamento.

A estas críticas sumábase o portavoz municipal de Ferrol en Común, Jorge Suárez, que tamén solicitou a retirada do punto da repartición das dedicacións da orde do día amparándose no artigo 75 da Lei de Base Local, ao argumentar que esta repartición "non está explicada para levarse a cabo", algo que non foi aceptado polo Secretario municipal.

"UN DÍA TRISTE PARA A ESQUERDA FERROLÁ"

Para o anterior rexedor, este pleno de organización converteuse nun "día triste para a esquerda ferrolá", tras producirse un "debate turbio e cheo de mentiras" nos días previos, ao mesmo tempo que criticou a Mato por abrir o debate sobre os salarios dos concelleiros "tal e como está a situación da cidade", pero tras "xogar coa aritmética variable", para Jorge Suárez dera que pensar que "haxa un pacto con Rei Varela".

Jorge Suárez tampouco quixo esquecerse do sucedido na anterior corporación, cando tras a ruptura do pacto de goberno entre Ferrol en Común e PSOE, socialistas e populares en dúas sesións plenarias retiraron as dedicacións a varios concelleiros do goberno, unha circunstancia que acabou cunha sentenza xudicial favorable ao entón goberno de Jorge Suárez "pero que foi recorrida tanto por PSOE, como polo PP."

O portavoz municipal de Ferrol en Común solicitou posteriormente que o control horario sobre os concelleiros con dedicación parcial estivese a cargo do departamento de Recursos Humanos do Concello e non polos grupos municipais, onde novamente se atopou coa negativa do secretario municipal. Debido a isto, solicitou ao pleno un informe xurídico.

"MENOS SALARIOS" QUE NOS ÚLTIMOS 12 ANOS

Unha vez finalizou este pleno de organización, compareceu ante os medios de comunicación o alcalde, Mato, quen pediu que o sucedido nesta sesión plenaria "non volva pasar no futuro", porque a cidade "está por enriba de calquera cuestión" e a súa obriga como rexedor é a de dedicarse "por corpo e alma a Ferrol."

En relación ás críticas de Ferrol en Común e de BNG, o alcalde afirmou que non ten nada que dicir "porque cada grupo expuxo o seu punto de vista", como tamén lembrou que esta corporación é "a que menos salarios terá en persoal nos últimos doce anos", algo que quixo deixar por escrito no expediente deste pleno de organización "no que hai 45.000 euros de diferenza coa corporación de 2011 e 20.000 euros coa corporación de 2015".