PSdeG e rupturistas piden trasladar a "vontade das urnas" a un goberno para evitar novas eleccións xerais

O PPdeG lamenta o "espectáculo" ofrecido por PSOE e Podemos, e o BNG avisa de que "irá a por todas" se se repiten os comicios.

Por Europa Press / Redacción | SANTIAGO DE COMPOSTELA | 26/07/2019 | Actualizada ás 15:34

Comparte esta noticia

PSdeG, En Marea e Grupo Mixto coincidiron ao mostrar o seu desexo de que "a vontade das urnas" se traslade a un goberno de progreso no Estado que permita evitar a celebración de novas eleccións xerais. Con todo, os nacionalistas xa avisan de que "irán a por todas" se hai repetición electoral para que Galicia "recupere" voz propia.

Xunta de portavoces no Parlamento galego
Xunta de portavoces no Parlamento galego | Fonte: Europa Press

Representantes das distintas forzas compareceron este venres tras a Xunta de Portavoces, reunión tras a que o socialista Xoaquín Fernández Leiceaga lembrou que a cidadanía fixo unha "demostración clara" da súa vontade o pasado 28 de abril, cunha "participación masiva" nas eleccións que derivou nunha "maioría progresista no Congreso" que, segundo indicou, "debe dar lugar a un goberno estable nas próximas semanas".

Ademais, considerou necesario "desculparse" ante a cidadanía pola investidura errada, da que culpou a Podemos. "Pablo Iglesias negouse a sentar co PSOE durante moito tempo mentres non se aclarase a cuestión da vicepresidencia e, onte mesmo, cando se fala de competencias, o que se está dicindo é que non se trata dun programa común, senón de que os ministros de Podemos poidan desde as súas áreas levar adiante o seu programa", censurou.

Fronte a iso, Leiceaga mostrouse partidario de "pechar un acordo programático" e, a partir de aí, "discutir as institucións de goberno". "Estamos aínda a tempo e hai que dar un esforzo cara adiante e darlle un goberno estable a España nas próximas semanas", manifestou.

Ademais, na súa intervención, lembrou que se houbo eleccións foi porque "unha serie de deputados progresistas" —en referencia aos de Podemos e os que entón conformaban En Marea— votaron no Congreso en contra dos orzamentos presentados por Pedro Sánchez.

"FRUSTRACIÓN E ENFADO"

Pola súa banda, o portavoz do Grupo Parlamentario de En Marea, Manuel Lago, asegurou compartir a "frustración" e "enfado" da maioría de esquerdas, pois "nas eleccións xerais houbo unha enorme mobilización cidadá para parar á dereita".

Dito isto, instou a "corrixir" a situación de "inmediato" e a reiniciar as negociacións "non máis aló do luns" co obxectivo de "formalizar, se é posible, no mes de agosto un novo goberno". "Este país non se pode permitir estar en interinidade durante máis tempo", indicou.

Ademais, asegurou que Pedro Sánchez incorreu en varios "erros" na negociación. "En primeiro lugar, non se pode esperar durante meses ata o último minuto para tentar chegar a un acordo, perdéronse 80 días", censurou Lago, que sinala que a "prioridade ten que ser o programa de goberno".

"Non se trata de debater ministerios, senón competencias. O que impediu o acordo foi a pretensión de xestionar a competencia do Ministerio de Traballo, pois cunha ministra de Unidas Podemos derrogariamos a reforma laboral", sinalou antes de pedir ao líder do PSOE "claridade" nas negociacións e censurar un posible acordo coa dereita.

O BNG, PREPARADO PARA NOVAS ELECCIÓNS

Pola súa banda, a viceportavoz parlamentaria do BNG, Olalla Rodil, fixo referencia á "comprensible fartura" dunha gran parte da cidadanía ao comprobar que as que se presentan como forzas progresistas e de esquerda "foron incapaces de chegar a un acordo", enredadas nunha "pelexa pola repartición de cadeiras e de ministerios".

"Entendemos ese cansazo e reitero que o Bloque está preparado para conseguir que Galicia volva ter voz propia no Congreso no caso dunha repetición electoral", asegurou Olaia Rodil, que deixou claro que se se repiten os comicios xerais, a súa formación "irá a por todas" para que Galicia recupere "voz propia" en Madrid.

"ACTITUDE IRRESPONSABLE"

Sobre o debate de investidura, ademais, o portavoz do Grupo Mixto, Luís Villares, censurou a "actitude irresponsable" de PSOE e Podemos porque "cun mandato tan grande para facer un goberno progresista" non foron capaces de chegar a un acordo.

"Tiñan un mandato cidadán superior ao mandato partidario para facer un goberno progresista", incidiu Villares, que volveu chamar á responsabilidade a ambas as formacións ao considerar que "está en xogo unha alternativa progresista para Galicia en 2020".

POSTURA DO PPdeG

En fronte, o secretario xeral do PPdeG, Miguel Tellado, criticou o "espectáculo" ofrecido por Podemos e PSOE durante o debate de investidura no Congreso dos Deputados.

"Son os responsables, levan meses discutindo única e exclusivamente sobre postos e cargos", censurou Tellado, que lamentou que España "leve trece meses de bloqueo" e "parálise absoluta".

Neste sentido, considerou que Sánchez está "completamente despreocupado dos problemas que afectan o país" e "especialmente a Galicia". "Veremos se son capaces de chegar a algún tipo de acordo ou se estamos avocados a unha nova cita coas urnas", sinalou Tellado, que aproveitou para contrastar a estabilidade do Goberno da Xunta coa "inestabilidade" estatal.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 1 comentario

1 Guillerme Gintonic

O BNG preparado para un novo fracaso en novembro