Pablo Casado varre aos sectores afíns a Feijóo da súa dirección
O núcleo duro do PP non contará con ningún galego. O líder popular rodease só dos seus máis afíns, entre eles, Cayetana Álvarez de Toledo, e cargos procedentes do aznarismo e do aguirrismo.
Por Galicia Confidencial | Madrid | 30/07/2019 | Actualizada ás 14:16
Galicia xa non pinta nada no PP de Madrid. O novo líder deste partido quixo mandarlle un recado a Alberto Núñez Feijóo e aos que, como el, opinan que, quizais, os populares teñan que negociar co PSOE para facilitar a investidura de Pedro Sánchez. Pablo Casado quixo cortar de raíz ese debate cunha reestruturación da cúpula do seu partido na que xa non estará a única galega afín a Feijóo, Marta González, vicesecretaria de Comunicación.
Con este novo golpe de man, Casado rodease só dos seus máis afíns e desterra aos distintos sectores aos que premiara con certos cargos tras gañar as Primarias de hai un ano, tanto sorayistas como os afíns a María Dolores de Cospedal. Entre eses dirixentes do novo PP destaca a polémica Cayetana Álvarez de Toledo, que pode será a voceira do PP no Congreso. Un posto ao que tamén aspiraba a ex alcaldesa de Logroño e actual vicesecretaria de Política Social, Cuca Gamarra.
Segundo algúns medios Gamarra podería ser nomeada Secretaria de Organización xa que Javier Maroto, outro dos homes de Casado, asumíu a Portavocía do PP no Senado. O grupo de afíns a Casado completariase co xornalista Pablo Montesinos, aposta personal do propio Casado, que podería ocupar, precisamente, o cargo de Marta González.
Outro dos que tamén sairía desa cúpula directiva é Vicente Tirado, até agora vicesecretario de Política Local e Autonómica e home afín a María Dores de Cospedal. O seu substituto podería ser Antonio González Terol, ex alcalde de Boadilla, aliñado co aguirrismo no PP madrileño e apoio da candidatura de Casado nas primarias.
OS GALEGOS
Os galegos quedan reducidos a segundos postos na nova dirección de Casado. Así, o deputado por Lugo Jaime de Olano pasará a ser novo vicesecretario de Participación, mentres que a deputada pola Coruña Marta González pasará de vicesecretaria de Comunicación a portavoz adxunta no Congreso.
