Por Europa Press / Redacción | SANTIAGO DE COMPOSTELA | 31/07/2019 | Actualizada ás 15:10
O portavoz de Compostela Aberta, Martiño Noriega, acusou oi alcalde de Santiago, Xosé Sánchez Bugallo, de "compartir conviccións políticas" co PP ao elixilo como "socio" para "pactar" os orzamentos técnicos do concello. Ademais, Noriega criticou que os socialistas non contactasen con Compostela Aberta para actuar como a "chave" que garanta a "gobernabilidade" neste sentido, sobre todo cando a formación "sempre tendeu a man" a "facilitar" a xerencia desde "unha perspectiva progresista".
O portavoz do anterior goberno aseverou que é "canto menos sorprendente e anacrónico" que na capital de Galicia o PSOE teña como "socio" o PP "non por descarte, senón por convicción".
Noriega destacou que este feito é "paradoxal" porque se produciu a un ano de que se celebren as eleccións autonómicas, ás que os socialistas galegos se presentarán como unha "alternativa" ao actual Goberno da Xunta de Alberto Núñez Feijóo.
Neste sentido, o líder de Compostela Aberta cre esta actitude "distorsiona" o movemento político actual, pero que a "boa sintonía" entre PP e PSOE está pactada previamente e conta o "beneplácito de Feijóo", aínda que non co das "altas instancias" dos socialistas.
DIMINUCIÓN DO ORZAMENTO
Por outra banda, Noriega reprochou á nova alcaldía que diminuíse as partidas orzamentarias destinadas a emprego e políticas sociais, en aras de aumentar o investimento no departamento de Festas.
Igualmente, existen "cuestións de carácter urxente" que se están deixando de lado "sen explicación", por exemplo a actuación sobre os muros de Fontiñas, que son un "problema de seguridade cidadá".
O portavoz de Compostela Aberta aludiu tamén á "obsesión por eliminar" as propostas dos veciños dos orzamentos participativos, dado que "moitos desaparecen e outros ven reducido o seu crédito", para financiar as festas.
Desta maneira, considerou que "Bugallo quere facerlle a competencia ao alcalde de Vigo, Abel Caballero", coas luces de Nadal no canto de darlle importancia ás políticas que afectan á cidadanía.
ESPECTÁCULO DOS LUMES DO APÓSTOLO
Martiño Noriega tamén anunciou que a súa formación rexistrou unha pregunta ao goberno local sobre o espectáculo dos lumes do Apóstolo, xa que nos vídeos reproducidos aparecía a ex-valedora do Pobo, Milagros Otero, no apartado no que se lle rendía homenaxe ás mulleres galegas.
O concelleiro lamentou que "Otero fose posta ao mesmo nivel de mulleres como Rosalía de Castro", xusto despois de que se fixo oficial a súa dimisión pola sentenza do TSXG, na que se lle acusa de "desvío de poder" na contratación da sobriña de Manuel Fraga.
Respecto diso, Compostela Aberta manifestou que quere saber se o goberno de Bugallo "adoptou algunha medida para eliminar" a imaxe de Milagros Otero despois de que se coñecese a súa aparición no ensaio previo a noite do 24 de xullo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.