Por Galicia Confidencial | Santiago de Compostela | 01/08/2019 | Actualizada ás 09:00
A realización, o próximo día 10 de agosto, en Lisboa, dun cumio de organizacións de extrema dereita de Europa motivou a convocatoria dunha manifestación de protesta para o mesmo día convocada por entidades de esquerda de Portugal e na que haberá presenza de organizacións doutros países, entre eles, Galicia.
“Nun país que viviu un réxime ditatorial e que conta na Constitución co artigo 46 que explicita a prohibición de organizacións racistas, as que fagan apoloxía da ideoloxía fascista ou que promoven a violencia, é difícil entender que este tipo de eventos poida acontecer”, subliña o manifesto dado a coñecer este martes.
Os organizadores da protesta esixen tamén aos partidos políticos que se posicionen e expliquen “as medidas que pretenden tomar para que este tipo de acontecemento non se poida realizar”. “A presenza e actuación de grupos terroristas e neonazis como Blood and Honour, Hammerskin ou a Nova Orde Social xa foi alertado pola Europol e o SIS”, recolle o manifesto. “Non podemos, nin aceptaremos a normalización deste discurso de odio e dos ataques dos cales estes grupos son autores”, engade.
Este chamamento á mobilización dos cidadáns, partidos, sindicatos e organizacións é subscrito, entre outros, polo Movemento Alternativa socialista, SOS Racismo, STOP Desahucios. Tamén tivo a adhesión de organizacións de Suiza, Francia, Bulgaria, Galicia, Inglaterra, Canadá e Brasil.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.