Morren dúas persoas e catro resultan feridas nun choque en Outes
Entre os feridos están dous menores.
Por Europa Press / Redacción | SANTIAGO DE COMPOSTELA | 05/08/2019 | Actualizada ás 09:45
Un home e unha muller de mediana idade faleceron nun accidente de tráfico rexistrado na noite deste domingo no termo municipal de Outes (A Coruña), mentres que catro persoas, unha parella e os seus dous fillos, resultaron feridas.
Segundo informaron a Europa Press fontes da Dirección Xeral de Tráfico, o sinistro tivo lugar na noite deste domingo, sobre as 21,00 horas, no quilómetro 77,4 da estrada AC-400 ao chocar dous turismos.
Foron mobilizados, apuntou o 112 Galicia, Bombeiros de Santa Comba, Garda Civil de Tráfico, GES de Muros, Protección Civil de Outes e de Mazaricos, ademais do 061, que desprazou o helicóptero medicalizado con base en Santiago, dúas ambulancias e o equipo sanitario da PAC de Santa Comba.
Segundo os datos facilitados polo 112 Galicia, o choque frontal ocorreu nunha recta no lugar das Paxareiras e os bombeiros desprazados confirmaron a excarceración das dúas persoas falecidas que viaxaban nun dos turismos.
Mentres, o catro ocupantes do outro vehículo, unha parella e dous fillos, resultaron feridos de consideración e foron evacuados polos servizos sanitarios. En concreto, o 061 levou a este catro persoas, dous menores e un home de 37 anos, L.G.R., xunto a unha muller de 38, M.C.R.C., ao Hospital Clínico en Santiago, sinalaron a Europa Press fontes sanitarias.
Pola súa banda, no lugar do accidente confirmouse o falecemento dun home de 62 anos, R.B.C.S., e da muller M.C.S.V., de 60 anos de idade, apuntaron as mesmas fontes sanitarias. Así mesmo, profesionais do Grupo de Intervención Psicolóxica en Catástrofes e Emerxencias (Gipce) e operarios do servizo de mantemento da vía tamén foron informados o suceso polo 112.
