Altos cargos, normas en tramitación e salarios, principais consultas no Portal de Transparencia da Xunta
A web acumula preto de 400.000 visitas desde a súa posta en marcha en marzo de 2016.
Por E.P. | SANTIAGO DE COMPOSTELA | 05/08/2019 | Actualizada ás 13:26
O Portal de Transparencia da Xunta de Galicia recibiu preto de 400.000 visitas desde a súa posta en marcha, a maioría delas buscando información sobre altos cargos autonómicos, normativa en tramitación ou contías das retribucións do persoal.
En suma, foron 394.756 desde 2016, das que 225.923 se correspondía con visitantes diferentes. Tamén foron consultadas máis de 1,5 millóns de páxinas, cunha media de catro por cada visita.
A maioría dos visitantes fixérono desde o seu computador de sobremesa (69,3%), o seu teléfono móbil (26,5%) ou unha tablet (4,2%) e as principais consultas foron altos cargos da Administración, con 61,479 visitas, a normativa en tramitación tanto en prazo de envío de sugestiones, pendente de aprobación ou publicada no DOG.
A estas consultas séguelle aquela información relativa ás contías das retribucións do persoal (46.304) e a axenda dos altos cargos da Xunta de Galicia (35.758).
Respecto das solicitudes de información pública, a maioría presentáronse a través de medios electrónicos (72,75 por cento). En total, ascenderon a 2.132 desde 2016, a maioría en 2017 e en 2018, con 796 e 723 respectivamente.
Os datos solicitados polos interesados responden a temáticas de diferente natureza, sobre todo en materia de ordenación do territorio e medio ambiente (387), subvencións e axudas (163) e patrimonial (131).
No balance realizado pola Administración galega destaca que a inmensa maioría das solicitudes foi recibida na Vicepresidencia e Consellería de Presidencia, Administracións Públicas e Xustiza, o 44,32 por cento, seguidos dos departamentos de Mar (13,56%) e de Infraestruturas e Mobilidade (7,55%).
RESOLUCIÓNS E EXPEDIENTES
Doutra banda, a maioría das resolucións rexistradas, máis do 89%, finalizaron nunha concesión. No caso dos expedientes, o 87,57 por cento están finalizados, o 7,88 por cento en tramitación e 4,55 foron resoltos por silencio administrativo.
A Xunta valorou especialmente o "destacable incremento" no uso de medios electrónicos por parte dos cidadáns á hora de formular as solicitudes, con respecto a anos anteriores, cifras que van na liña dos obxectivos do Goberno galego para reducir os trámites presenciais, potenciar a administración dixital e reducir o uso do papel.
