Os sindicatos de Ryanair en España convocan 10 días de folga en setembro contra o peche de bases

Os sindicatos USO e Sitcpla de tripulantes de cabina (TCP) de Ryanair en España rexistraron esta mañá o preaviso para unha folga de dez días o próximo mes de setembro (1, 2, 6, 8, 13, 15, 20, 22, 27 e 28), nas trece bases españolas da aerolínea irlandesa (entre elas Santiago de Compostela) en protesta pola súa intención de pechar tres delas.

Nun comunicado, sinalan que o motivo da devandita folga é "impedir o peche das bases de Gran Canaria, Tenerife Sur e Girona, se neste último caso se confirmase o anunciado como intención, así como os despedimentos que dese peche se derivaran no persoal directamente contratado por Ryanair e o que aínda está ilegalmente nas axencias satélite", segundo explicou Manuel Lodeiro, portavoz do sindicato Sitcpla.

O portavoz do Sitcpla engadiu que a folga "está convocada por unha ameaza contundente, expresada non só na mesa, senón persoalmente nas bases de Gran Canaria e Tenerife". Ademais, asegurou que os problemas xerais con Ryanair "non obedecen a este feito illado, senón a un proceso de incumprimentos reiterado que abocou á decisión máis drástica que pode tomar un persoal en defensa dos seus postos de traballo".

Ambos os sindicatos xa advertiran de que convocarían paros en setembro tras o anuncio da aerolínea irlandesa que xa avisou en febreiro do axuste de bases e recortes de emprego. Ryanair avanzou entón posibles axustes nas súas bases pola evolución do negocio derivada da incerteza do 'Brexit', ao que se engadiu o impacto polo atraso nas entregas do pedido de 30 avións 373 MAX, co que contaba para verán e cuxas entregas están suspendidas.

"Nos próximos días recibiremos a citación da SIMA para a mediación e, de non haber acordo, a folga convocarase de maneira formal. Dubidamos moito da predisposición de Ryanair a chegar a un acordo, e mesmo a presentarse con talante negociador", tras máis dun ano de reunións, afirman desde USO.

O secretario de Organización de USO-Ryanair, Jairo Gonzalo, criticou a "actitude de burla" da compañía tras máis dun ano de reunións en organismos oficiais españois, e engadiu que non albergan "a máis mínima esperanza de entendemento" ante esta situación.

USO e Sictpla espera que o Ministerio de Fomento "non volva a anular a súa capacidade de folga e non decrete, como o ano pasado, uns servizos mínimos tan abusivos que nin sequera permitían os paros", conclúe Gonzalo.

A sección sindical do sindicato español de pilotos de liñas aéreas (Sepla) en Ryanair realizará unha votación entre os seus afiliados aos que exporá se realizar mobilizacións en resposta á ameaza de despedir a 100 pilotos que fixo a compañía irlandesa recentemente.

No resto de Europa, o sindicato Balpa, que defende os intereses dos pilotos británicos de Ryanair, convocou xornadas de folga para o 22 e 23 de setembro e entre o 2 e o 4 de setembro. En Irlanda, o sindicato Fórsa votou a favor de ir á folga, co respaldo do 25% do persoal de pilotos.

MÁIS DE 1,4 MILLÓNS DE PRAZAS AFECTADAS

Ryanair comunicou aos sindicatos a súa intención de pechar as bases de Tenerife Sur, As Palmas, Xirona e Faro (Portugal) en xaneiro de 2020, unha medida que de levarse a cabo pode afectar a máis de 1,4 millóns de prazas aéreas que xa estaban programadas para o primeiro semestre do ano, segundo un estudo de Mabrian Technologies, en colaboración con Interface Tourism Spain.

Desde Ryanair asegúrase que, tal e como se anunciou o pasado 16 de xullo, debido á entrega tardía de ata 30 avións 737 MAX este inverno, varias bases de Ryanair se reducirán ou se pecharán este inverno. A compañía di que ningunha ruta se verá afectada, xa que serán atendidas por voos desde outras bases a partir de novembro cando comece o horario de inverno.

Tras presentar as súas contas, o conselleiro delegado de Ryanair, Michael O'Leary, anticipou nun vídeo que se verá obrigada a acometer despedidos, que se aplicarán a finais de setembro, e de novo tras o Nadal, tras a caída de beneficios, no que dixo que á compañía lle sobran 500 pilotos e 400 asistentes de voo.

Ryanair pechou o primeiro trimestre do seu exercicio fiscal, finalizado o pasado 30 de xuño, cun beneficio de 243 millóns de euros, un 21% menos que un ano antes.