Un detido na Coruña por presunta agresión sexual a unha muller
Con posterioridade ao seu arresto, o detido compareceu ante a Policía Nacional, que asumiu a investigación, segundo confirmaronfontes policiais.
Por E.P. | A CORUÑA | 06/09/2019 | Actualizada ás 18:28
Axentes da Policía Local detiveron este venres a un home na Coruña como presunto autor dunha agresión sexual a unha muller na cidade herculina.
Os feitos producíronse no Monte de San Pedro, aínda que a detención do presunto autor foi no paseo marítimo, á altura de Riazor, segundo confirmou a alcaldesa da Coruña, Inés Rey, que pediu "cautela" ante uns feitos cuxos datos ata o momento son "de carácter provisional e escasos". Con posterioridade ao seu arresto, o detido compareceu ante a Policía Nacional, que asumiu a investigación, segundo confirmaron a Europa Press fontes policiais.
DETENCIÓN
De acordo coa información achegada polo Consistorio, a Policía Local detivo ao home, de 32 anos, na avenida da Habana, próxima a Riazor, sobre as 06,00 horas, acusado da presunta violación a unha moza de 18 anos.
Segundo o informe policial, a Policía Local tivo coñecemento dos feitos a través dos amigos e amigas da nova, que tras o aviso trasladáronse á zona da praia de Riazor onde se tomou declaración á moza e despois detiveron ao presunto culpable.
No caso deste último, tras declarar ante a Policía, foi acusado dun delito sexual e posto a disposición xudicial. A nova, pola súa banda, foi trasladada ao PAC da Casa do Mar para ser avaliada por profesionais sanitarios.
O Concello activou tamén os mecanismos fixados para este tipo de delitos e puxo a disposición da vítima a axuda que establece o protocolo en vigor. Tras estes feitos, a alcaldesa manifestou que están a traballar coa área de Seguridade Cidadá e outras administracións para previr estes casos e ofrecer unha atención integral ás vítimas.
