Amancio Ortega segue financiando os servizos públicos galegos
A súa fundación financiará con 90 millóns as sete residencias de maiores da Xunta, a "maior doazón" da súa historia á Xunta. O PPdeG saúda a medida.
Por Europa Press / Redacción | SANTIAGO DE COMPOSTELA | 13/09/2019 | Actualizada ás 12:06
A Fundación Amancio Ortega financiará con 90 millóns de euros a construción das sete residencias proxectadas pola Xunta nas principais cidades da comunidade e que, en total, sumarán 900 novas prazas para a rede pública de Galicia.
Así o ratificaron este venres coa firma dun convenio de colaboración en Santiago de Compostela, nun acto no que participaron a vicepresidenta primeira da Fundación, Flora Pérez Marcote, o presidente da Xunta, Alberto Núñez Feijóo, e a conselleira de Política Social, Fabiola García.
Tras a firma do convenio, Núñez Feijóo destacou ante os presentes que "o servizo público" está en "todas as capas" da sociedade galega e subliñou que con esta "doazón" desméntese " a esa minoría que afirma que as empresas non invisten no ámbito social", co fin de "enrocarse no falso mito dun sector privado inhumano".
Na mesma liña, o presidente destacou que "a chave do futuro está na colaboración leal entre o sector público e o sector privado". Fontes da fundación Amancio Ortega ratificaron a Europa Press que esta constitúe a maior "doazón" que a entidade realiza á Xunta de Galicia en toda a súa historia.
PPdeG
Pola súa banda, o secretario xeral do PP de Galicia, Miguel Tellado, agradeceu este venres á Fundación Amancio Ortega a súa "xenerosidade" e "compromiso social". Nunha rolda de prensa celebrada no Parlamento autonómico, o número dous dos populares galegos felicitou tamén á Xunta "por conseguir este mecenado", fronte a "sectarismos" practicados --dixo-- pola esquerda, "que ao final non redundan na mellora da calidade de vida dos galegos".
"Esta achega de Amancio Ortega de 90 millóns de euros vai permitir liberar eses fondos --xa consignados nos orzamentos autonómicos de 2019-- e dedicalos a outros fins tamén de ámbito social. Por tanto, estamos ante unha dobre boa noticia", subliñou.
