Feijóo di que non hai alternativa ao PP: "Imos unir o que estaba unido"
De cara a esas eleccións de novembro, Feijóo apoiou a posibilidade de que PP e Ciudadanos se unan nas candidaturas en Cataluña.
Por Europa Press / Redacción | SANTIAGO DE COMPOSTELA | 23/09/2019 | Actualizada ás 16:17
O presidente da Xunta de Galicia, Alberto Núñez Feijóo, asegurou que nas eleccións de novembro o seu partido debe deixar claro aos electores que non votar ao PP é facelo ao PSOE e que non hai alternativa a un goberno socialista que outro encabezado polos 'populares', polo que apelou aos votantes a "unir o que estaba unido".
"A única alternativa para que o socialismo e o populismo con apoio do independentismo non prosiga é unir o voto. O que estaba unido non convén desunirlo", dixo Feijóo en declaracións tras asistir ao Comité Executivo Nacional do PP en Madrid.
Feijóo subliñou que a súa formación leva décadas "unindo o centro-dereita": Manuel Fraga "iniciou" este proxecto, José María Aznar consolidouno "" e Mariano Rajoy "conseguiu o resultado máis amplo nunca conseguido, 11 millóns de votos", dixo dos anteriores presidentes do PP.
Asegurou que o discurso hoxe do actual presidente, Pablo Casado, abunda ao seu xuízo nesta liña e é "moi claro". "Nesa segunda volta, o PP sae a unir o voto e a explicar claramente aos cidadáns que se non votamos ao PP estamos a votar ao socialismo e ao populismo", reiterou.
PROXECTO PARA CATALUÑA
De cara a esas eleccións de novembro, Feijóo apoiou a posibilidade de que PP e Ciudadanos se unan nas candidaturas en Cataluña. A portavoz do PP no Congreso, Cayetana Álvarez de Toledo, ofreceu o número 1 por Barcelona que ela ocupou o 28 de abril á portavoz de Ciudadanos, Inés Arrimadas, nunha lista conxunta.
O dirixente galego foi desde o principio remiso á idea de España Suma, que rexeitou no caso galego, pero apoiou esrte luns esta proposta en Cataluña. "Paréceme moi ben. Oxalá en Cataluña haxa unha alternativa ao nacionalismo e ao independentismo", dixo o dirixente galego.
Ao seu xuízo, sería unha forma de "recompor" a expectativa que ao seu xuízo creou a propia Arrimadas, pero que non chegou a cumprir, en referencia a que gañou as eleccións autonómicas naquela comunidade pero non tentou formar goberno.
"Foi sorprendente o que fixo Inés Arrimadas, parecía unha alternativa útil e converteuse nunha expectativa errada. Sería bo recompor esa expectativa porque creo, ademais, que hai vimbias para facelo", concluíu.
