3.000 quilos de boi para degustar en dúas semanas

Allariz vén de presentar os menús e tapas que ofrecerán ata o 13 de outubro máis de 20 establecementos hostaleiros que participan na oitava edición das Xornadas de Carne de Boi de Allariz.

Por X.M. Fernández | Allariz | 29/09/2019 | Actualizada ás 10:00

Comparte esta noticia

O concurso de tapas terá como ingrediente principal a exquisita carne de boi de Allariz e as persoas que degusten as diferentes tapas, mínimo catro, poderán votar no concurso cubrindo a tarxeta de votación e optando, así, a varios premios, como un mandil conmemorativo das xornadas, unha comida para dúas persoas (para os/as que consuman mínimo 9 tapas) e un vale de 200 euros para investir no comercio local para a persoa que sexa quen de consumir todas as tapas.

Boi de Allariz. Fonte: Concello de Allariz
Boi de Allariz. Fonte: Concello de Allariz

Das votacións dos/as clientes/as sairá a mellor tapa e outorgarase un diploma ao local hostaleiro galardoado.

Galicia Confidencial colabora na promoción deste certame gastronómico e sortea, a través da rede social Facebook, 3 menús dobres entre aqueles/as que compartan o contido indicado en tres accións a realizar durante os días que duran as xornadas de Carne de Boi de Allariz. Permanecede, pois, atentos/as ás nosas publicacións e moita sorte!.

BOIS DE ALLARIZ, DE RAZAS AUTÓCTONAS

Seis bois de Allariz, de razas autóctonas -limiá e caldelá-, foron os sacrificados para atender a demanda que require un evento destas características e que cada ano esperta maior interese. Cunha media de 450 quilogramos cada exemplar, a hostalería de Allariz disporá de máis de 3000 quilos de carne de boi de Allariz para elaborar os seus menús.

Presentación das Xornadas de Carne de Boi 2019. Fonte: Concello de Allariz
Presentación das Xornadas de Carne de Boi 2019. Fonte: Concello de Allariz

Dentro dun programa de dinamización económica, coñecido como “Allariz Sabe”, naceu un proxecto de cría e comercialización de carne de boi de Allariz no ano 2011 co obxectivo de recuperar a base territorial e facer explotacións produtivas, previr os incendios e apoiar á hostalería ofrecendo un produto de calidade. Este plan de dinamización permite a comercialización de exemplares nados e criados en Allariz, no Monte Penamá, e cebados na explotación O Rego en Coedo.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 1 comentario

1 GalegON

Que bo traballo. De formiguiñas pero aos poucos teñen un concello modelo de moitas cousas. Parabéns!