Kim Lenz, a coñecida como 'raíña do rockabilly', estará no Outono Códax Festival 2019
O prestixioso 'festival galego de música negra' que patrocina Martín Códax chega á súa 9º edición.
Por X.M. Fernández | Santiago de Compostela | 02/10/2019 | Actualizada ás 10:00
Martín Códax, en colaboración con Pousadas de Compostela, Raíña Productions e A Reixa achegará a Galicia o mellor da 'música negra' con cinco citas imprescindibles en Santiago de Compostela (15 e 19 de outubro, 9 e 29 de novembro, e 1 de decembro).
O festival volve xuntar os sons máis selectos do rhythm&blues, o soul, o blues, o country, o boogie woogie ou o rock´n roll clásico a través dunha coidada programación na que, fiel á súa filosofía, inclúe a participación de artistas e bandas de referencia internacional, destacados nomes da escena estatal e algunhas das formacións galegas máis relevantes ou emerxentes do panorama actual.
O cartel será integramente inédito en Galicia, unha proba máis do compromiso do Outono Códax por facilitar o acceso dos fans do xénero aos directos de artistas de renome que dificilmente chegan aos escenarios galegos e que, como é o caso, ata o de agora non actuaron na nosa comunidade. Ademais da diva estadounidense Kim Lenz, recoñecida mundialmente como a raíña do rockabilly; chegan a Compostela, entre outras propostas atractivas, The Rhum Runners, unha banda franco-belga, e Los Torontos, dúas propostas 'moi canallas' que sorprenderán.
Na web do Outono Códax esá a programación e información completa dos artistas e bandas e un acceso para a reserva de entradas e abonos.
CANCELACIÓN
Outra cabeza de cartel que tiña o festival, a estadounidense Nikki Lane, vén de anunciar estes días que cancelaba a xira europea, co cal tamén se cae a data que tiña para o Outono Códax (1 de decembro). A organización lamenta profundamente o sucedido, informando a través das súas redes sociais que é a primeira vez que acontece algo así despois de 80 artistas e bandas que teñen pasado polos escenarios do festival.
A organización informa así mesmo que se devolverá o importe íntegro das entradas que xa foran reservadas para o concerto desta artista; e sobre os abonos indican que coñecida a banda ou artista que cubra a actuación cancelada, aquelas persoas que xa mercaron o seu abono poderán conservalo se así o desexan (o abono será válido igualmente) ou, no caso de que non sexa así, abrirase un prazo de devolución.
