Expertos demandan que as empresas teñan un protocolo de protección das traballadoras embarazadas

A importancia de que as empresas conten cun protocolo por escrito que aclare os "pasos a seguir" cando unha das traballadoras queda embarazada ou ten un bebé lactante, así como a avaliación de riscos específicos, é unha das recomendacións que inclúe a nova campaña lanzada pola Xunta para dar a coñecer a empresarios e traballadoras as obrigacións e dereitos nesta materia.

Baixo a lema 'Mírelo por onde ou mires... todo suma', a iniciativa difundirá folletos e baners para concienciar o sector empresarial de que durante o embarazo e primeiros meses do bebé "existen algúns riscos específicos no medio laboral" que deben valorarse.

A secretaria xeral de Emprego, Covadonga Toca, participou este xoves nunha presentación desta nova campaña a axentes implicados na seguridade e a saúde no traballo, ante quen apostou por "sensibilizar as empresas" na mellora das condicións laborais para as mulleres embarazadas ou nais recentes.

A campaña da Xunta, aínda que lembra que o embarazo "non é unha enfermidade", incide en que existen "condicións" laborais que "poden resultar perigosas para as futuras nais ou para o bebé".

Por iso, tentarán "informar, formar, concienciar e sensibilizar" as empresas e os empresarios sobre o necesario traballo de avaliación de riscos orientado a estas cuestións, dado que a maternidade é unha situación que "implica a toda a sociedade".

AVALIACIÓN INICIAL

Os expertos na materia inciden en que a necesaria avaliación de riscos das empresas debe incluír a perspectiva da maternidade, de modo que xa estea contemplada esta posibilidade antes de que se dea un embarazo entre as traballadoras.

Do mesmo xeito, destacan os beneficios de que exista un protocolo por escrito dos "pasos a dar" en canto se produce un embarazo no persoal, co obxectivo de que se activen canto antes as medidas de adaptación e protección.

"Se hai unha avaliación inicial de riscos e unha listaxe de postos exentos, pode entrar en marcha desde o primeiro momento", explican os expertos, o que levaría a unha actuación máis "áxil". "Que exista un protocolo sinxelo, que as mulleres saiban con quen teñen que porse en comunicación e que pasos dar nun clima de confianza", destacou Manuel López, de Quirón Prevención.

A maiores, cando a muller comunica á empresa a súa situación, debe existir unha avaliación adicional e, en caso de haber un risco, adaptar as súas condicións de traballo ou realizar un cambio de posto. "É necesario que a empresa incentive que as mulleres cumpran os seus dereitos", destacan os expertos que, no entanto, inciden en que debe evitarse "que se vaia ao último paso directamente", a suspensión do traballo por risco, fomentando que "se traballe nunha contorna segura".

A Xunta presenta unha campaña para concienciar sobre a protección de traballadoras embarazadas.. XUNTA | Fonte: Europa Press