En 2018 asináronse máis de 150.000 contratos que implican cambiar de provincia dentro de Galicia
O desprazamento do profesional a outra provincia, da mesma comunidade autónoma ou non, o que supón un 9,6% máis con respecto a 2018.
Por Europa Press / Redacción | SANTIAGO DE COMPOSTELA | 16/10/2019 | Actualizada ás 17:33
Os galegos asinaron máis de 157.000 contratos que supoñen un cambio de provincia do profesional durante o ano 2018, segundo un informe da empresa de recursos humanos Randstad. O estudo destaca que o 14,5% do total dos contratos asinados durante o ano supoñen mobilidade, cinco décimas por encima da media (14%).
En concreto, durante o pasado exercicio asináronse en Galicia 157.078 contratos que supoñen o desprazamento do profesional a outra provincia, da mesma comunidade autónoma ou non, o que supón un 9,6% máis con respecto a 2018.
No ámbito provincial, Lugo, con 373 contratos, é a única provincia galega cun saldo positivo de traballadores. Doutra banda, Pontevedra foi a provincia que perdeu máis traballadores, 23.890. Séguena Ourense (-7.738) e A Coruña (-794).
En canto á taxa de mobilidade --o peso dos contratos que esixen mobilidade con respecto ao total de contratos--, Ourense, co 16,9%, é a provincia cunha maior porcentaxe. A continuación, con taxas máis discretas, atópanse Lugo (16,3%), A Coruña (13%) e Pontevedra (11,1%).
DATOS HISTÓRICOS
Os datos no ámbito estatal revelan que a mobilidade laboral interprovincial bateu marcas en 2018. Randstad destaca que este tipo de contratos supuxeron 3,1 millóns "por primeira vez na historia". Ademais, o 14% do total dos contratos asinados durante o ano supoñen mobilidade, a maior taxa desde que hai rexistros.
Durante 2018 tiveron lugar 3.115.364 contratos que levaron o desprazamento do profesional a outra provincia, sendo ou non da mesma comunidade autónoma, o que supón un 6,9% con respecto a 2018, cando se rexistraron 2.914.055 contratos de mobilidade, e 113,2% máis que en 2001, a cifra máis baixa do período analizado, 1.461.057.
A taxa de mobilidade tamén supuxo rexistrar a cifra máis alta do século. En concreto, durante o exercicio anterior, o 14% dos contratos asinados implicaba a mobilidade do profesional a outra provincia, unha taxa non coñecida na serie analizada.
