Por E.P. | SANTIAGO DE COMPOSTELA | 20/10/2019 | Actualizada ás 14:40
O Partido Socialista de Galicia (PSdeG) considera que o Goberno está a actuar con "proporcionalidade e serenidade" en Cataluña, desde a "constitucionalidade" e "de forma razoable", mesmo en situacións "que pon en cuestión a orde pública".
Así o manifestou o secretario xeral do PSdeG, Gonzalo Caballero, este domingo na Coruña, á vez que mandou unha mensaxe de "apoio" aos feridos dos enfrontamentos de Barcelona, en especial aos axentes que formaron parte das cargas policiais durante os disturbios.
Con todo, para o socialista galego a situación de Cataluña "non pode ser o único debate do país", xa que o 10 de novembro decidirase o avance do país "na senda de liberdades sociais e cuestións como o dereito ao aborto, a unha morte digna, á igualdade real, á loita contra a violencia de xénero ou á memoria histórica".
Ese día tamén estará en xogo "unha axenda social que defenda a subida das pensións, o salario mínimo interprofesional, a sanidade pública, a dependencia e todo o que permite ter un modelo de convivencia democrática que permite que ninguén quede na cuneta", engadiu.
Para conseguilo, Caballero anima a unir o "voto da esquerda" en Pedro Sánchez, "para frear á dereita e á ultradereita" que poden avocar nun goberno presidido por Pablo Casado "e orientado" polo ideario de Santiago Abascal. Advertiu da "importancia de ir votar e de que ninguén se poña de perfil" para non "levar un susto" e que se "cuestionen as liberdades e dereitos sociais".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.