O BNG ve a exhumación de Franco como un "paso positivo" pero "insuficiente" para acabar co franquismo

A portavoz nacional do BNG, Ana Pontón, considerou que a exhumación dos restos do ditador Francisco Franco do Valle dos Caídos é un "paso positivo" pero "insuficiente" para acabar cos "vestixios" do "franquismo rancio".

En declaracións aos medios tras participar nun acto con estudantes en Santiago de Compostela, a líder do BNG considerou que "non só hai que exhumar os restos de Franco" senón que "hai que exhumar os restos do franquismo en toda a súa dimensión".

Así, argumentou que hai outras medidas que tamén é necesario adoptar. "Segue habendo uns xuízos que se fixeron durante o franquismo que seguen vixentes e hai que revisar, hai unha lei de memoria histórica que a nós nos parece insuficiente pero que aínda así se incumpre", censurou Pontón.

A xefa de filas dos nacionalistas galegos citou expresamente os "incumprimentos" desta normativa que, na súa opinión, leva a cabo a Xunta de Galicia e, fronte a iso, apostou por "construír unha sociedade na que se poñan os alicerces para que haxa uns principios democráticos fortes".

"Que siga habendo uns pozos negros do franquismo ten moito que ver cunha transición que non foi unha ruptura co réxime franquista e que estamos a ver que conduce a que haxa demasiados espazos en negro nos que se están coartando liberdades públicas", manifestou.

Ademais, apuntou que na sociedade española seguen existindo "vestixios" dun "franquismo rancio" que, segundo indicou, se ven en "como se nega a existencia da diversidade lingüística" ou "como non se acepta que no Estado español conviven diferentes nacións". "Ata que iso non se acepte non teremos unha democracia propia", subliñou.

Por último, preguntada pola aprobación no pleno do Concello de Pontevedra dunha moción presentada polo PP --co rexeitamento do BNG-- en apoio ás Forzas e Corpos de Seguridade do Estado que están despregadas en Cataluña, Pontón acusou aos populares de estar "nunha campaña sen sentido".

"Feijóo en todos estes anos non foi capaz de defender os intereses de Galicia e, como segue sen ter alternativa de futuro, busca como desviar a atención", considerou a portavoz nacional do BNG. "Está claro que o PP está nunha deriva españolista, rancia e fóra da realidade dos galegos", engadiu Pontón.

HONRAS AO DITADOR

O deputado de Galicia en Común Antón Gómez Reino tachou este martes de "electoralista" a exhumación de Franco e pediu ao Goberno que non permita que se fagan misas ou se rendan "honras a un ditador" nun lugar de patrimonio público como o Cemiterio de Mingorrubio, onde será inhumado este xoves.

Gómez Reino recalcou que o Goberno non ten que facer "ningunha celebración" polo traslado porque chega "40 anos tarde". "Se alguén ten que celebrar e a alguén hai que agradecer que Franco vaia saír do Val de Cuelgamuros é ás asociacións de memoria que levan tanto tempo traballando", dixo.

Ademais, recalcou que se o PSOE "crese de verdade na memoria histórica devolvería o Pazo de Meirás e a Casa Cornide aos galegos".