A Deputación de Pontevedra presenta un orzamento de 161 millóns de euros

A presidenta da Deputación de Pontevedra, Carmela Silva, xunto ao vicepresidente, César Mosquera, compareceron este mércores en rolda de prensa para dar a coñecer os orzamentos da Administración provincial para 2020 que alcanzan os 161 millóns de euros, o que supón un incremento dun 1,9% respecto dos anteriores.

O orzamento consolidado, que inclúe as cantidades destinadas á Escola de Enfermaría e o Consorcio contra incendios, elévase ata os 164,5 millóns.

Entre o máis destacable deste orzamento está a redución da débeda a 3,9 millóns, "preto da débeda cero", sinalou Silva. Neste sentido, a presidenta lembrou que cando o Partido Socialista e o BNG fixéronse cargo da Deputación en 2015 a débeda era de 41 millóns de euros. "Podemos presumir tamén nisto de ser unha administración modélica", comentou.

Segundo explicou Carmela Silva, as contas do Goberno provincial priorizan "cinco grandes áreas que dan sentido a toda a acción de goberno": a sustentabilidade e a transición ecolóxica (á que se destinan 27,4 millóns de euros); economía, innovación e emprego (10,4 millóns); avance sociocultural e deportivo (33,9 millóns); igualdade (1,3 millóns) e asistencia económica e técnica aos concellos (54,4 millóns de euros).

César Mosquera valorou que son uns orzamentos presentados "en tempo e forma, mesmo con anticipación" que "supoñen un bo avance no que temos acordado" e, rematou o nacionalista, "son a demostración de que hai un goberno con ideas, con impulso, sólido e que ten uns obxectivos ben claros" que se irán facendo "efectivos na práctica".tación Fitopatológica do Areeiro, Leira de Mouriscade e Cidade Infantil Príncipe Felipe "que teñen un custo para a Deputación de máis de 16 millóns de euros".

Neste sentido, Carmela Silva propuxo á Xunta "que fagamos un intercambio: nós financiamos todo o que ten que ver coas emerxencias e a Xunta que quede con todos estes servizos".

O goberno provincial conta con aprobar de maneira inicial este orzamento no próximo pleno fixado para o 5 de novembro.