As cinzas do "máximo defensor de Castelao", Rodolfo Prada, descansan xa nos Peares

As cinzas mortais do intelectual "máximo defensor de Castelao", Rodolfo Prada, descansan desde este domingo no cemiterio de Casdavil, no municipio ourensán dos Peares. Con esta acción, a Deputación de Ourense deu cumprimento á vontade do intelectual, cun acto cívico-relixioso no que se lembrou o último desexo de Prada: "descansar en paz de Deus na terra na que nacín, cando Galicia recupere a democracia, arrebatada pola forza da barbarie, e alcance o autogoberno do que é merecedora como pobo con identidade propia".

Agora, despois do seu falecemento en 1980 en Arxentina, as súas cinzas foron devoltas á súa terra natal. Respecto diso, o presidente da Deputación, Manuel Baltar, destacou que este "é un exercicio de memoria histórica, un acto de xustiza e de reparación, que chega 39 anos despois da súa morte".

"Hoxe cúmprese a vontade dun home bo e xeneroso, dun galeguista cabal e dialogante que defendeu os seus ideais con convicción lonxe de sectarismos e intransixencias, dun católico que insistiu na necesidade dunha Igrexa que falase na lingua do pobo e que atendese á realidade do país. Por iso, hoxe cumprimos unha débeda", sinalou Baltar.

Pola súa banda, o escritor Luís González Tosar engadiu que "o presidente e motor principal" da Organización Republicana Nacionalista Galega converteuse no home máis fiel e leal a Castelao cando chegou a Buenos Aires.

Ademais, ao acto tamén acudiu a neta de Prada, María Elena Prada, desde Santiago de Chile.