Un xabaril provoca unha colisión múltiple na Autopista das Rías Baixas á altura de Allariz
Unha muller necesitou axuda para poder saír do seu vehículo.
Por Europa Press / Redacción | OURENSE | 04/11/2019 | Actualizada ás 09:45
Unha muller resultou ferida e tivo que ser rescatada por mor dunha colisión múltiple provocada por un xabaril que irrompeu na autovía A-52, á altura do punto quilométrico 211, no municipio de Allariz (Ourense).
Segundo informou o 112 Galicia, o servizo de emerxencias tivo constancia dos feitos tras recibir as chamadas de alerta de diversos particulares sobre as 20,00 horas deste domingo.
A irrupción do animal provocou a colisión entre tres vehículos mentres circulaban pola parroquia alaricense de San Breixo de Queiroás, concretaron as mesmas fontes. Segundo a información facilitada polos alertantes, como consecuencia do impacto, un dos ocupantes dun dos automóbiles implicados no sinistro necesitou axuda para saír do vehículo.
Por iso, o 112 solicitou a colaboración de Urxencias Sanitarias de Galicia-061, dos Bombeiros de Xinzo de Limia e dos membros do GES de Pereiro de Aguiar. Unha vez no punto, os servizos de emerxencia procederon a liberar á ferida.
Ao lugar, confirmaron a Europa Press fontes sanitarias, o 061 enviou unha ambulancia medicalizada que trasladou ao Complexo Hospitalario Universitario de Ourense (CHUO) á muller ferida, T.B.P., de 23 anos.
Ademais, para garantir as condicións de seguridade na vía, por parte do 112 Galicia solicitouse a intervención da Garda Civil de Tráfico, de Protección Civil da localidade e do servizo de mantemento da estrada.
