O aviso laranxa na costa continuará este martes por ondada e vento

O risco importante por fenómenos costeiros e ondas de ata seis metros afectará as provincias do norte e noroeste da Península, desde Pontevedra ata Guipúzcoa.

Por E.P. | SANTIAGO DE COMPOSTELA | 04/11/2019 | Actualizada ás 18:44

Comparte esta noticia

O litoral galego continuará este martes en aviso laranxa ante a previsión de forte ondada na totalidade da costa de Galicia, segundo a predición de Meteogalicia. Así, prevense ondas de entre cinco e seis metros e ventos de forza sete de compoñente noroeste que tamén obrigan a decretar o aviso amarelo en toda a costa galega.

A nivel estatal, un total de 22 provincias terán este martes aviso de risco ou risco importante por fenómenos costeiros, choiva, vento e neve, segundo informou a Axencia Estatal de Meteoroloxía (AEMET).

O risco importante (laranxa) por fenómenos costeiros e ondas de ata seis metros afectará as provincias do norte e noroeste da Península, desde Pontevedra ata Guipúzcoa. Con menor nivel de risco (amarelo) a forte ondada afectará tamén as provincias de Valencia, Almería, Granada, ás illas Baleares de Mallorca, Menorca, Eivissa e Formentera así como á cidade autónoma de Melilla.

Ademais, o risco por vento afectará a Cantabria, Biscaia, Tarragona, Castelló, Valencia, Alacante, Albacete, Murcia, Almería, Xaén, Granada, Madrid, Teruel, Eivissa e Formentera, onde se esperan refachos de vento de 80 a 90 quilómetros por hora.

O risco por choivas que serán fortes ou persistentes e deixarán ata 50 litros por metro cadrado en 12 horas activouse para as provincias de Navarra e Guipúzcoa, mentres que Huesca terá aviso por nevadas que poderán deixar un cinco centímetros de neve no pirineo.

Este martes, a Axencia Estatal de Meteoroloxía (AEMET) espera precipitacións persistentes e que poden ser localmente fortes no extremo norte de Galicia e no Cantábrico e ventos fortes con refachos de moi fortes na Península e Baleares.

Ademais, prevé que seguirá a inestabilidade e as precipitacións persistentes no norte de Galicia e no Cantábrico, onde as choivas poderán ser localmente fortes e con treboadas. Noutras zonas do terzo norte peninsular as precipitacións tamén poderán ter certa persistencia, igual que en áreas montañosas da metade norte.

As precipitacións serán en forma de neve a partir de 1.400 ou 1.600 metros en zonas de montaña da metade norte da Península. Tamén se esperan de forma máis débil e dispersa en zonas de Andalucía oriental, na contorna da área do Estreito, este de Cataluña e en Baleares e tenderán a remitir ao longo do día. En Canarias as choivas afectarán o norte das illas de maior relevo.

Respecto das temperaturas diúrnas, prevese un descenso xeneralizado na Península e nos arquipélagos e as mínimas descenderán e deixarán xeadas en zonas de montaña e que serán máis intensas en Pireneos.

Finalmente, o vento soprará do oeste e noroeste na Península, Baleares e Estreito e será forte ou con refachos moi fortes no litoral Cantábrico, principalmente no sector oriental. Os ventos fortes ou con intervalos fortes afectarán os litorais, a áreas de montaña e a páramos da metade norte e do leste de Baleares. En Canarias soprará vento de compoñente norte.

Temporal no mar
Temporal no mar | Fonte: @ Miguel Núñez

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta