Sindicatos denuncian un reaxuste de traballadores e servizos pola patronal de ambulancias

Os sindicatos do sector de ambulancias CIG, CC.OO. e UGT denunciaron este venres que a patronal de ambulancias en Galicia lles comunicou un reaxuste de traballadores e redución de servizos. Así o informaron tras a reunión mantida coa patronal do sector na mañá deste venres. As centrais sindicais cren "intolerable" o reaxuste de cadros de persoal e a redución no servizo que se presta á cidadanía.

Por iso, as tres organizacións sindicais demandan unha "reunión urxente" á Consellería de Sanidade para "contrastar esta situación" e, "no caso de que estes recortes sexan confirmados", advirten de que tomarán "as medidas oportunas".

Na acta da reunión indícase que a Federación Galega de Empresarios de Ambulancias (Fegam), trasladou aos sindicatos que, despois de ter unha reunión co Sergas respecto do exceso no número de servizos que se realizan, o Servizo Galego de Saúde díxolle que "non teñen medios para contrastar que exista o exceso de servizos que se alega por parte da patronal".

Ademais, por parte do Sergas indican que, aínda que están dispostos a falar da cuestión coas diferentes EOXIs, "non se comprometen a facerse cargo dos custos derivados deses servizos", indícase na acta. A patronal solicita ao Sergas a suba salarial pactada na firma do convenio e o Sergas "responde que non procede, xa que o actual contrato non o contempla".

RESCISIÓN DE CONTRATO

Ante esta situación a patronal solicitou ao Sergas a rescisión do contrato ou ben a non renovación do mesmo tras a súa finalización debido ao "desequilibrio económico que lle supoñen as subas pactadas no convenio actual".

Pola súa banda, a parte social deixou constancia na reunión, segundo a acta, de que "a información facilitada pola parte patronal significa un reaxuste nos persoais e tamén unha redución no servizo que se lle presta á cidadanía".

AMBULANCIAS

Fronte a iso, a Fegam puntualizou que o contrato que o Sergas asinou coas empresas concesionarias do servizo de transporte sanitario non urxente, e que data de 2016, "contempla un total de 337 ambulancias para toda Galicia". "Na actualidade, para cubrir este servizo, e tendo en conta as horas de traballo necesarias para dar saída a todas as peticións realizadas polo sete EOXIs, necesítase o equivalente a 70 ambulancias máis", explica a patronal.

"Este exceso de traballo, por enriba do pactado en convenio, están a asumilo de forma unilateral os empresarios", subliñou a Fegam, que asegura que "o Sergas é coñecedor desta situación desde hai meses e na última reunión que os seus representantes mantiveron, o 10 de outubro de 2019, sinalaron que ao non ser capaces de contrastar este incremento, non ían aumentar o importe do convenio". "Este dato sería facilmente contrastable se todos os hospitais utilizasen o sistema TSNUX de rastrexabilidade do servizo", abundou.

Ante esta situación, as empresas representadas pola Fegam solicitaron ao Sergas a rescisión do contrato, ou ben a non renovación do mesmo tras a súa finalización en xuño de 2020, "debido ao desequilibrio económico que lles supón este incremento do gasto", aclarou a patronal.

Con todo, insistiron en que "os empresarios de ambulancias seguiron realizando este exceso de traballo non remunerado dada a relevancia do servizo que prestan á cidadanía", xa que "son usuarios habituais do transporte sanitario non urxente, entre outros, os pacientes oncolóxicos ou os pacientes que van a rehabilitación, a diálese, así como para os traslados interhospitalarios", apostila a Fegam.

Por iso, os empresarios aseguran que "seguirán cumprindo cos servizos requiridos, tamén o non incluídos no contrato, ata coñecer a decisión do Sergas respecto da súa demanda".

"Na vontade de diálogo que sempre caracterizou aos empresarios de ambulancias de Galicia, informouse esta mañá (venres) aos representantes sindicais, quen sinalaron que non era un tema da Comisión Paritaria", concluíu a Fegam.