Por Europa Press / Redacción | SANTIAGO DE COMPOSTELA | 08/12/2019 | Actualizada ás 11:00
Unha moza de vinte anos morreu e outra persoa resultou ferida esta madrugada despois de saírse da vía e envorcar o vehículo no que viaxaban polo municipio de Touro. O condutor do coche arroxou unha taxa positiva no test de alcoholemia realizado polos axentes de Tráfico.
Segundo informa o 112, todo ocorreu sobre as 3,30 horas, cando recibiu a chamada dun particular que alertaba dun accidente á altura da discoteca Dona Dana.
O alertante indicaba que o coche estaba envorcado na cuneta e que puideran sacar a unha muller ferida. Durante a mesma chamada, outro particular comunicaba á central de emerxencias que había no interior outra persoa inconsciente e atrapada no coche. Así, o 112 deu o aviso a Urxencias Sanitarias-061, á Garda Civil de Tráfico e aos bombeiros de Arzúa. Os membros de Protección Civil foron informados o sinistro.
Foi necesaria a intervención dos bombeiros de Arzúa para liberar á vítima mortal, que quedou atrapada no interior do vehículo. A outra persoa, unha moza de 22 anos, resultou ferida e foi evacuada ao Hospital Clínico de Santiago, segundo indica o 061. O terceiro ocupante, o condutor, resultou ileso.
ACCIDENTE EN ORTIGUEIRA
Por outra banda, outra persoa resultou ferida nun accidente rexistrado en Ortigueira sobre as 6,00 horas da mañá deste domingo. O accidente, indica o 112, ocorreu na AC-862, pero o coche saíuse da vía e caeu por un terraplén ata o medio da DP-6122, ao redor do punto quilométrico 5.300, á altura da gasolineira de Mera.
Ademais dos servizos sanitarios, ata o lugar desprazáronse, avisados polo 112, os bombeiros do Eume, os membros do GES de Ortigueira e os axentes de Tráfico. Tamén interveu o servizo de mantemento da estrada. Unha vez liberado o ferido --único ocupante do vehículo--, foi trasladado en ambulancia por Urxencias Sanitarias-061.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.