Puy Fraga recoñece que houbo "un problema de comunicación" no PP polo peche do paridoiro de Verín

O portavoz parlamentario do PPdeG, Pedro Puy, proclamou este luns que o Grupo Popular está "unido" ante o conflito xerado polo peche do paridoiro do Hospital de Verín, a pesar das críticas da dirección provincial do partido en Ourense, que encabeza Manuel Baltar, e de alcaldes da comarca. Puy engadiu que considera que coa decisión, baseada "en criterios técnicos", houbo "un problema de comunicación".

"O Grupo Parlamentario está unido, grazas polo interese", sentenciou Puy, preguntado, tras a habitual reunión de grupo dos luns, se teme que no próximo pleno haxa deputados do PP de Ourense que poidan romper a disciplina de voto ante as iniciativas en contra do peche do paritorio de Verín presentadas pola oposición.

Puy defendeu a decisión de pechar o paridoiro porque así o recomendan "os xinecólogos e pediatras da área". "Entendemos que está dirixida a garantir a seguridade das nais e dos fillos no momento do parto. Isto é o que estamos a apoiar e temos a conciencia absolutamente tranquila respecto diso", aseverou.

"Temos confianza en que a decisión que se adopta é razoable e de que ningún goberno tomaría outra en contra do criterio dos especialistas", esgrimiu, antes de insistir en que está "única e exclusivamente" dirixida a velar pola "seguridade" das nais e dos bebés.

"PROBLEMA DE COMUNICACIÓN"

En todo caso, Puy si que recoñeceu que houbo "un problema de comunicación" coa medida, que non se trasladou á sociedade "da mellor forma". Así, remitiuse "aos resultados" e ao "descontento" suscitado. E é que, ao seu xuízo, o "racional" é pensar que calquera cidadán estaría a favor de dar o paso "máis seguro" para a súa saúde e en seguir as recomendacións médicas en cuestión.

Pero todo iso ocorre, engadiu, nun "contexto" político determinado, no que aludiu ás "postverdades" e á defensa por parte da oposición de decisións políticas que "non respectan o criterio de autoridade dos especialistas".

UNIDADE DO GRUPO

Ante a insistencia dos xornalistas acerca de se este conflito podería romper a unidade do Grupo Popular, posto que Baltar pediu unha rectificación, Puy replicou que el responde o seu ámbito de actuación --o Grupo Parlamentario--, asegurou que está "unido" e censurou a "forma pouco digna de facer oposición" dos rivais políticos de Alberto Núñez Feijóo.

Así, lamentou que busquen "a ruptura" da unidade de Grupo Popular, algo "que ata agora non pasou", fronte ao que ocorreu nas bancadas da esquerda.