Galicia, a segunda autonomía que máis autónomos perde, 17.000 en dez anos
O país pasou dos 226.309 aos 209.525, o que supón un descenso en termos relativos do 7,4%, segundo os datos de ATA Autónomos.
Por Europa Press / Redacción | SANTIAGO DE COMPOSTELA | 20/12/2019 | Actualizada ás 11:12
No últimos dez anos (novembro de 2009 a novembro de 2019) Galicia perdeu 16.784 autónomos, pasando dos 226.309 aos 209.525, o que supón un descenso en termos relativos do 7,4%, segundo os datos de ATA Autónomos.
Esta caída de 16.784 autónomos sitúa Galicia como a segunda autonomía con maior perda de autónomos, tan só superada por Castela e León (-17.914 autónomos).
Segundo o presidente da Asociación de Traballadores por Conta Propia de Galicia, Rafael Selectos, "as cifras evidencian que as comunidades que máis sofren o despoboamento son as que máis autónomos perden".
"Non sabemos se é causa ou consecuencia, o que é evidente é que Galicia non se pode permitir perder tantos autónomos. Eles vertebran o territorio e danlle sentido ao medio rural", indicou.
PROVINCIAS
Todas as provincias galegas perden autónomos sendo Lugo a que leva a peor parte, con 5.808 menos, seguida da Coruña (-4.861 autónomos), Ourense (-3.700 autónomos) e, en último lugar, Pontevedra (-2.415 autónomos).
Pola súa banda, no conxunto do Estado, no mesmo período analizado, suma 104.851 novos autónomos, alcanzando os 3.270.358 segundo un informe realizado pola Federación Nacional de Asociacións de Traballadores Autónomos (ATA), a partir dos últimos datos facilitados pola Seguridade Social.
