A Xunta destaca o "gran traballo" que fai o Centro Galego de Cuxhaven por manter a cultura galega en Alemaña

O secretario xeral de Emigración, Antonio Rodríguez Miranda, mantivo unha reunión este luns co presidente do Centro Galego de Cuxhaven, Francisco Álvarez, na cal sinalou o "gran traballo" que fai a organización para que "a cultura galega se manteña nun país tan importante para a emigración" galega como é Alemaña.

O secretario xeral avogou por "seguir traballando xuntos para facilitar a volta a casa de miles de galegos". Indicou ademais que "o novo cambio xeracional garante a fortaleza dos centros a través dos mozos".

Miranda agradeceu así o "labor que están a desenvolver" na organización con actividades para a divulgación de "temas de interese" de Galicia no exterior.

A Xunta indicou que o Centro Galego de Cuxhaven leva 40 anos promovendo oferta cultural e deportiva aos seus socios, dos cales un 70% son galegos. Entre os seus actos está a Festa da Primavera, na cal celebran, entre outros, o Día das Letras Galegas e o Día de Galicia.

Por último, mencionou que Alemaña é o terceiro país de Europa con maior poboación galega. Segundo os últimos datos publicados polo INE, o 1 de xaneiro de 2019, é en total de 17.388 cidadáns, dos cales o 46,75% naceron en Galicia.