A Xunta ve "sensata e acorde cos tempos" a decisión de deixar de lanzar os lumes do Apóstolo desde o Obradoiro

O conselleiro de Cultura e Turismo, Román Rodríguez, cualificou de "sensata" e "acorde cos tempos" a decisión do Concello de Santiago de deixar de lanzar os lumes do Apóstolo desde a Praza do Obradoiro tras máis de 450 anos.

"Os tempos evolucionan e é obvio que a potencia que ten hoxe un espectáculo pirotécnico non é a mesma que a que tiña fai 50, 40 ou 30 anos", manifestou.

Na súa intervención, Román Rodríguez avogou por respectar o patrimonio e lembrou que na Catedral "está a facerse un investimento moi importante con fondos públicos".

"É moi importante compatibilizar todo o esforzo que se está facendo. Non parece moi coherente dedicar unha cantidade importante de fondos públicos a rehabilitar un ben patrimonio da humanidade, como é a Catedral, e que mañá fagamos un espectáculo pirotécnico", indicou.

Ademais, alertou da afectación dos lumes ao Pazo de Raxoi, no que se sitúa o Concello de Santiago. "Temos que compaxinar o espectáculo co respecto ao patrimonio, aos bens públicos e aos recursos", apuntou.

Con todo, destacou que as "novas tecnoloxías" permitirán facer un "grande espectáculo de luz e son", unha "alternativa absolutamente entretida e brillante para os cidadáns".