A veciñanza de Touro fala da mina (II): "Se Feijóo deixa que se reabra será para fodernos; queren destruír Galicia enteira"

O Sindicato Labrego Galego, en colaboración coa Rede contra a Minaría Destrutiva na Galiza ContraMINAcción e a Plataforma Veciñal Mina Touro-O Pino NON, iniciou unha serie de vídeoentrevistas nas que veciños e veciñas de Touro falan "sen mordazas" sobre como impacta nas súas vidas a actividade mineira e industrial de Cobre San Rafael e Tratamientos Ecológicos del Noroeste (TEN), e da "ameaza que se lles vén enriba" co proxecto de Atalaya Mining.

Nesta segunda achega, Manuela Rendo explica como renunciaron aos seus postos de traballo en Euskadi, onde ela emigrara, para retornar á aldea natal. Foi por causas de saúde, xa que Manuela padece dende nova da respiración e non podía vivir nun ambiente contaminado como o de Bilbao. Ao pouco de chegar a Galicia, Riotinto cesaba a súa actividade mineira en Touro e viviron ben até que coñeceron o novo proxecto de extracción de cobre. Agora, Manuela teme que todo aquilo polo que loitaron durante anos lles sexa arrebatado pola especulación ao redor do cobre.