Falece un ciclista ao chocar cun camión en Bergondo

Un ciclista faleceu en Bergondo nun accidente de tráfico cun camión, segundo informou a Europa Press o 112 e recolle tamén a súa conta de Twitter.

O accidente produciuse sobre as 15,30 horas no lugar de San Paio, na parroquia de Guísamo, na estrada que une Bergondo co encoro de Cecebre.

Desde o 112, informaron que o ciclista morreu tras golpearse co camión que o alcanzou. Ao lugar, acudiron efectivos de Urxencias Sanitarias de Galicia-061, que non puideron facer nada para salvarlle a vida.

Á zona onde tivo lugar o sinistro, trasladáronse tamén efectivos da Garda Civil, da Policía Local e dos Bombeiros de Betanzos.