Un País que se disipa sen remedio

«¿Cómo direi Galicia / para que me entendan? / Estás nas fouces, nas eixadas, / nas picarañas, nas lareiras, / estás nas dornas... Ai qué berces / onde Galicia vai e nunca medra» (Arredores, Antonio Tovar)

Por Xosé Antón Jardón | Vilar de Santos | 05/02/2020

Comparte esta noticia
Por moito que chanquee, o señor Feijoo, malia aparentar que ouvea cara o desabafo da temperanza, amais de ser o natural arremedo de Casado é un deses pillabáns que, como diría o meu tío, «con xente así, cafés os que queiras; tratos ningúns». Iso si, talvez lle axude algo a perseverante parvidade que levamos agarrada ao pescozo os pasmóns da progresía,
cada día máis empeñados en seguir pacendo nos cadabullos da inopia.
 
E, é neses lares onde o mestre da picardía zoupona aproveita o principio gastronómico, «quen paga manda», para indicarlle aos chafallas da ´nouvelle cuisine` as especias coas que deben adobar os potaxes –léase, enquisas electorais– para facerlle engulir gato por lebre a unha clientela dotada de padais sen papilas gustativas, que acabará co estómago revolto
e coa cabeza ateigada dos paxariños causantes de alucinacións, que só aquedan cando chega o desvarío.
 
Detrás das últimas enquisas, meticulosamente ilustradas con estampas de brillantes cores polo xornal de confianza do Excelentísimo Pillabán, agóchase unha despensa enzoufada de tonalidades engaiolantes, capaz de apampar tanto a seareiros como a contrarios, todos adoecidos por gabar, antes de probalo, o menú que cociñan os “si wuana” de Feijoo, para
facelos pensar que, como non o pagan ao contado, nunca lles pasarán a factura. Pobres ilusos!
 
En resumidas contas, á vista dos antecedentes históricos e dunha razoable e alxébrica
análise dos datos dispoñíbeis, todo parece indicar que, detrás do aparente empate técnico
que nos debuxan de cara as vindeiras autonómicas, non deberiamos descartar unha nova
maioría (absoluta?) do PP, escoltada por Vox (por se acaso), adornada cuns mellorábeis
resultados do PSOE e serias dúbidas de quen ficará por diante, o BNG ou UP.
 
Ah! O meu tío Lisardo é dos que pensan que o único antídoto, capaz de derrotar ao PP, para darlle paso a un goberno que mire cos dous ollos cara o País, é unha cooperativa galeguista onde o BNG, sen renunciar á hexemonía, asuma a idea de que, se non conta con todos, non hai nada que rañar. Vaque si?.

(I-D) O presidente da Xunta de Galicia, Alberto Núñez Feijóo, e o presidente do PP, Pablo Casado, saúdan durante un acto do PPdeG en Oleiros (A Coruña/Galicia/España) a 6 de outubro de 2019.. M. Dylan - Europa Press
(I-D) O presidente da Xunta de Galicia, Alberto Núñez Feijóo, e o presidente do PP, Pablo Casado, saúdan durante un acto do PPdeG en Oleiros (A Coruña/Galicia/España) a 6 de outubro de 2019.. M. Dylan - Europa Press
Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Antón Jardón Secretario-interventor de Administración Local xubilado. Foi alcalde de Vilar de Santos, deputado provincial, vicepresidente da FEGAMP (Fedreación Galega de Municipios e Provincias) e Delegado da Consellería de Industria de Ourense no goberno do bipartito. Militou no BNG e en CxG. Hoxe en día non ten afiliación política. Na actualidade dedícase á actividades culturais, especialmente a través do Museo da Limia, no que desempeña o posto de Coordinador do seu Padroado.