Cando o fútbol é paixón nunha lameira e non negocio multimillonario: o épico derbi de Ribeira
O SH Palmeira e o SD Xuventu Aguiño empataron 1-1 nun partido que se fixo viral nas redes sociais polas condicións nas que se xogou.
Por Galicia Confidencial | Santiago de Compostela | 13/02/2020 | Actualizada ás 12:57
Existen dous tipos de fútbol: un, o multimillonario e mediático fútbol profesional en inmensos e luxosos estadios nos que homes ricos disputan balóns en céspedes que son auténticas alfombras, baixo os focos de televisións de todo o mundo, luces publicitarias e a ollada de miles de seareiros; outro, o fútbol de base, o modesto, o que se xoga en pequenos campos de barrios e parroquias, sen apenas luz, en terreos impracticables, sen atención mediática nin multitudes, e que é xogado por estudantes, fontaneiros, taxistas, panadeiros, mestres...
En Ventín, un lugar da parroquia de Palmeira, en Ribeira, disputouse un modesto derbi da Terceira División Galega que rematou en empate 1-1... e algo máis. O duelo entre o SH Palmeira e o SD Xuventu Aguiño foi unha épica batalla no lodo que se converteu nun fenómemo de masas... nas redes sociais.
