As vendas de vehículos usados caen en Galicia no mes de xaneiro
En suma realizáronse 8.980 transferencias, a maioría na Coruña e Pontevedra.
Por E.P. | SANTIAGO DE COMPOSTELA | 20/02/2020 | Actualizada ás 11:49
As transferencias de vehículos usados caeron un 8,33 por cento no mes de xaneiro en Galicia. Así se desprende dos datos da consultora MSI para a Federación de Asociacións de Concesionarios da Automoción (Faconauto).
En suma realizáronse 8.980 transferencias, a maioría na Coruña e Pontevedra, con 3.672 e 3.329, respectivamente. As maiores reducións experimentáronse en Lugo e Ourense, con caídas de máis do 15 e do 19 por cento.
Cataluña (26,7%), Madrid (20%), Castela a Mancha (16,2%), Navarra (13,1%), Canarias (5,5%) e Asturias (1,5%) foron as comunidades que aumentaron as súas vendas en xaneiro respecto ao mesmo mes do ano pasado.
No panorama estatal, as vendas aumentaron un 2,3% nese período, ata situarse en 164.506 unidades, sobre todo nos modelos de entre 0 e 5 anos. As transferencias de coches de entre 0 e 3 anos creceron un 12,8%, mentres que o segmento de entre 3 e 5 anos aumentou un 24,5%. O resto dos tramos de antigüidade experimentaron en xaneiro un retroceso.
En relación coas canles de venda, as compañías de renting, cun 42,5%; os concesionarios, cun 27,5%, e o rent a car, cun 15,7%, foron os que aumentaron as súas transferencias respecto ao mesmo período do ano anterior. Só nos concesionarios, as entregas de coches de segunda man supuxeron un 25,1% do mercado, con 41.310 unidades.
En canto ao tipo de combustible, o máis demandado polos compradores de vehículos usados volveu ser o diésel, con case o 60% do total. A gasolina acaparou o 38,4%, mentres que se contabilizaron 449 transferencias de modelos eléctricos, un 72% mais en comparación con xaneiro de 2019.
