A cúpula do PPdeG traballa no deseño das listas, que incorporarán conselleiros de Feijóo
Respecto da presenza de Ciudadanos, o secretario xeral mostrouse prudente. "Por respecto ás conversacións que se produciron e que se poidan producir, cando haxa algo que comentar, comentarase", dixo.
- G. Caballero pide "acougo" á militancia porque o seu compromiso é facer "as mellores listas"
- Catro dos dez postos de saída nas listas do PSOE pontevedrés son de Vigo e Redondela
Por Europa Press / Redacción | SANTIAGO DE COMPOSTELA | 26/02/2020 | Actualizada ás 20:52
O secretario xeral do PPdeG, Miguel Tellado, subliñou este xoves que a dirección autonómica do partido, que lidera Alberto Núñez Feijóo, traballa na confección das candidaturas ás eleccións do 5 de abril coas cúpulas provinciais.
Como é habitual, os populares galegos prevén apurar os prazos e previsiblemente as listas completas non se darán a coñecer ata o vindeiro luns 2 de marzo, cando finaliza o prazo para o seu rexistro. "Cando estean farémolas públicas; o habitual é que se faga con pouco ruído", sentenciou Tellado.
Fontes do partido consultadas por Europa Press dan por feito que, do mesmo xeito que sucedeu na última convocatoria, o protagonismo dos conselleiros de Feijóo será significativo nas candidaturas, de acordo coa súa "previsibilidade" e con que esta vía constitúe unha fórmula para remarcar a propia xestión do Executivo.
De acordo con este principio, as listas nas que haberá máis continuidade serán as de Pontevedra --na que previsiblemente o vicepresidente da Xunta, Alfonso Rueda, volverá ir como número dous-- e A Coruña, xa que son tamén as que contan cun maior número de conselleiros.
En Pontevedra podería incorporarse algún nome novo en representación da cidade de Vigo, como podería ser a actual delegada territorial da Xunta e presidenta da xestora local, Corina Porro.
Na Coruña, á marxe da presenza dos conselleiros, dáse por feito que non faltarán outros nomes en postos de saída como o do presidente provincial do PP, Diego Calvo, que foi cabeza de cartel nos anteriores comicios autonómicos. A presenza do propio Tellado ou de Pedro Puy (portavoz do Grupo Parlamentario) está, así mesmo, fóra de discusión.
A maior renovación, á espera de que Feijóo e os presidentes provinciais dean o seu visto e prace definitivo ás candidaturas --o habitual é que se apuren os prazos--, podería producirse nas provincias de Lugo e Ourense.
PRESENZA DE CIUDADANOS
Tellado foi preguntado este mércores acerca de se se deron avances nos contactos para incorporar a dirixentes de Ciudadanos ás candidaturas populares.
Aínda que se descarta que poidan incorporarse en postos de saída --a mensaxe do propio Feijóo deste martes así o dá a entender--, o secretario xeral mostrouse prudente respecto diso. "Por respecto ás conversacións que se produciron e que se poidan producir, cando haxa algo que comentar, comentarase", dixo.
En todo caso, fontes do PPdeG deron por feito que, se Ciudadanos, agora mesmo inmerso no seu propio proceso de primarias para a elección de candidato, quere continuar negociando tras o 'non' de Feijóo á coalición, é a formación laranxa a que deberá dar o paso e só entón se vería se se dan as condicións para un acordo.
