A caída de emprego e facturación no naval lastran o crecemento do sector metal galego

A facturación do sector metalúrxico galego creceu en 2019 un 2 por cento, ata alcanzar os 13.680 millóns, unhas cifras que non cumpriron as expectativas da Asociación de Industriais Metalúrxicos de Galicia (Asime), e que están condicionadas polas "crises" de dous grandes construtores navais, os estaleiros Hijos de J. Barreras e Vulcano (este xa en proceso de liquidación).

Así o trasladou o secretario xeral de Asime, Enrique Mallón, durante a presentación do informe do sector en 2019, e na que explicou que, no pasado exercicio, o metal galego tivo uns 67.000 traballadores, un 1 por cento máis que en 2018.

Con todo, e a pesar do crecemento na facturación de industrias como a automoción (un 2 por cento máis, ata os 8.650 millóns), a construción e estruturas metálicas (un 1,5 por cento de subida, ata os 1.010 millóns) ou a aeronáutica (unha facturación de 132 millóns, un 2 por cento máis), a construción naval e os seus auxiliares tiveron un 2019 complicado.

Segundo os datos presentados por Asime, o naval galego perdeu un 20,84 por cento do emprego en 2019, e quedou cuns 9.500 traballadores; así mesmo, a facturación tamén sufriu un descenso do 11 por cento, ata situarse en 1.180 millóns de euros.

"Esta é a realidade da industria naval", proclamou Mallón, quen lembrou os problemas de Vulcano e Barreras, e sinalou que, en 2019, a carteira de pedidos dos estaleiros galegos contaba con 24 unidades, e 12 contratos novos (tres menos que o ano anterior).

Enrique Mallón advertiu de que 2020 "vai ser un ano de desaceleración", e apuntou que os principais retos do metal galego seguen sendo a atracción de profesionais cualificados, a implantación da eólica mariña, ou a atracción de grandes construtores aeronáuticos, entre outros.