A Xunta e a Fiscalía de Galicia reforzarán a coordinación fronte á sinistralidade laboral
Asinarán un convenio para mellorar a eficacia na prevención, investigación e persecución dos delitos relacionados coa seguridade e saúde das persoas traballadoras.
Por Europa Press / Redacción | SANTIAGO DE COMPOSTELA | 08/07/2025 | Actualizada ás 16:35
O conselleiro de Emprego, Comercio e Emigración, José González, e o fiscal superior de Galicia, Fernando Suanzes, asinaron este martes un convenio de colaboración entre a Xunta e o Ministerio Fiscal para reforzar a coordinación institucional e mellorar a eficacia na prevención, investigación e persecución dos delitos relacionados coa seguridade e saúde das persoas traballadoras. Especialmente no caso de sinistros laborais con resultado de morte ou lesións graves con posible transcendencia penal, comprometéndose a "cooperar de maneira activa para garantir que as actuacións sexan tratadas con axilidade, rigor e eficacia".
Nesta liña, a Xunta indicou nunha nota de prensa que a intención é establecer canles de comunicación e protocolos de actuación en materia de seguridade e saúde laboral. De modo que se establezan canles de comunicación mutuos que permitirán intercambiar "información clave" en relación cos accidentes laborais máis graves, así como sobre infraccións administrativas que poidan derivar en responsabilidades penais. Por parte da Fiscalía, establécese o compromiso de informar á Consellería sobre as actuacións derivadas da documentación remitida polas autoridades laborais, tales como a incoación de dilixencias, o arquivo de procedementos ou a interposición de denuncias.
En canto aos procedementos xudiciais, tamén se notificarán a emisión de acusacións ou o ditado de sentenzas, así mesmo, a Fiscalía facilitará datos estatísticos e informes anuais sobre a súa actividade neste ámbito, en coordinación coa Fiscalía Xeral do Estado. A Xunta, pola súa banda, comprométese a reforzar a cooperación técnica coa Fiscalía mediante a remisión de informes, a oferta de formación especializada para fiscais en materia de prevención de riscos laborais e a poñer a disposición de asesoramento técnico por parte do Issga. Con todo, a Consellería organizará cursos formativos e xornadas técnicas anuais con participación de fiscais, xuíces, persoal inspector e responsables da Administración autonómica, co obxectivo de "intercambiar coñecementos e boas prácticas", segundo debullou.
