Detido un home na Coruña por violencia de xénero tras golpear a súa parella
Foi un veciño quen informou á Policía do que estaba acontecendo no edificio de enfronte.
Por Europa Press / Redacción | A CORUÑA | 09/03/2020 | Actualizada ás 16:53
Axentes da Policía Local detiveron na Coruña un home por un delito de violencia de xénero, segundo informa no seu parte de incidencias policiais. Os feitos producíronse sobre as 23,30 horas do 7 de marzo cando unha patrulla procedeu á detención do home, veciño da Coruña, de 51 anos e nacionalidade portuguesa.
Minutos antes desa hora, cando os axentes prestaban servizo de prevención á Seguridade Cidadá, foron requiridos pola Sala Operativa do 092 para que se personasen nun domicilio do barrio do Agra do Orzán, onde segundo o alertante, podería estar a se producir un delito de violencia machista.
Personados os actuantes no lugar, foron requiridos polo informante que lles manifestou que cando se atopaba na xanela observou como nun piso fronte ao seu, un home discutía cunha muller e que, nun momento dado, o posteriormente detido, propinou á vítima diferentes golpes na cara e pescozo.
Á súa vez informou que, antes da chegada dos funcionarios, o agresor abandonou o lugar en dirección ao mercado municipalde as Conchiñas. Tras o manifestado pola testemuña, os axentes personáronse no domicilio, sendo atendidos pola vítima, que presentaba un elevado estado de excitación e que corroborou o manifestado polo denunciante.
Tamén lles indicou que o agresor era a súa parella sentimental e que quería denuncialo xa que non era a primeira vez que sufrira agresións por parte del. Os funcionarios constataron a existencia de diferentes contusións no rostro da muller.
Os axentes, tras dar unha batida pola zona, localizaron ao home, que foi detido e trasladado a dependencias policiais onde ingresou en calabozo para a súa posterior posta a disposición da autoridade xudicial.
