Por Europa Press / Redacción | SANTIAGO DE COMPOSTELA | 11/03/2020 | Actualizada ás 21:38
A plataforma Galicia Baleira propuxo ás institucións galegas un plan de descentralización dos órganos da Administración e empresas públicas, que "leve a Galicia a distribuír os poderes políticos e o funcionariado como base para frear o despoboamento rural e a súa integración nunha sociedade avanzada con calidade de servizos e prestacións, que favorezan e fixar poboación nesta área".
Así, a plataforma fai mención a "casos de descentralización administrativa e de servizos" xa en marcha, como a Academia Galega de Seguridade Pública, situada na Estrada, do mesmo xeito que os servizos centrais de 112 e 061, ou as delegacións de Pesca en Vigo e A Mariña.
Para continuar este proceso, reclaman que Ourense sexa "referencia" para a xestión termal na Comunidade, creando o Instituto de Termalismo de Galicia, á vez que reclaman para esta localización a sede da Consellería de Medio Ambiente.
"Lugo, con todo dereito, debería de ser a sede autonómica da Consellería de Medio Rural", engade a plataforma, que insta "a todos os partidos políticos a situarse sobre a descentralización de organismos e servizos.
A maiores, reclaman "cambios lexislativos en urbanismo rural", para "evitar o bloqueo", permitindo "a construción de novas vivendas a nivel de servizos requeribles", creando un parque de vivenda de aluguer a prezo taxado, fomentando a ampliación ou construción de novas obras de tipo industrial e traballando na simplificación dos trámites administrativos.
Entre outras cuestións, tamén esixen un "profundo cambio na accesibilidade aos servizos básicos", como a sanidade, habilitando centros de saúde, persoal suficiente e ambulancias "para prestar servizos en menos de 15 minutos"; ou os servizos sociais, un ámbito no que reclaman axuda persoal ás persoas maiores que vivan soas con "verdadeiros plans de acompañamento".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.