Os actores galegos, "preocupados" e "perplexos" pola "inacción" do ministro de Cultura
Máis de trinta asociacións de ámbitos culturais de todo o estado asinan un documento conxunto titulado '52 medidas extraordinarias para as artes escénicas e musicais".
Por E.P. | SANTIAGO DE COMPOSTELA | 08/04/2020 | Actualizada ás 20:51
ConArte, confederación de artistas de España que aglutina a diferentes entidades entre a que se atopa a Asociación de Actores e Actrices de Galicia (AAAG), mostra a súa "perplexidade" e "preocupación" ante a "inacción recoñecida" por parte do ministro de Cultura, José Manuel Rodríguez Uribes, "disposto a abandonar o sector cultural".
Censuran que o martes o ministro ofrecese a súa primeira rolda de prensa desde o estado de alarma para "afirmar que o seu departamento non tomou nin tomará nun futuro próximo ningún tipo de medida específica".
"A indolencia e irresponsabilidade mostrada polo ministro de Cultura e Deportes contrasta coa entrega e colaboración que mostrou un sector, o das artes escénicas e musicais, que nas últimas semanas desenvolveu un frutífero traballo de colaboración e diálogo cuxo resultado é o documento conxunto asinado por máis de trinta asociacións destes ámbitos culturais titulado '52 medidas extraordinarias para as artes escénicas e musicais".
Neste documento, feito público o pasado sábado e entregado ao Ministerio de Cultura o luns, especifícase un conxunto de propostas urxentes para afrontar as consecuencias da crise sanitaria provocada polo Covid-19 no sector da escena e a música.
Así, úrxese a tomar medidas en materias como contratación pública, medidas laborais e relacionadas coa seguridade social, impostos, subvencións, financiamento empresarial e fomento da cultura para "paliar" as dificultades existentes.
