Máis de novecentas persoas dos arredores de Santiago foron atendidas por Cáritas desde o inicio da emerxencia sanitaria

Cáritas da Unidade Pastoral de Milladoiro, Teo e a súa contorna leva atendidas a máis de 900 persoas desde o comezo da emerxencia polo COVID-19, a quen se proporciona alimentos de primeira necesidade, medicación e artigos básicos de hixiene persoal.

Así, durante os primeiros 40 días desde o inicio do confinamento, Caritas atendeu a 931 persoas. As 265 familias ás que pertencen están en situación de vulnerabilidade e risco de pobreza extrema, debido a que viron reducidos de maneira moi significativa os seus ingresos mensuais, explica a entidade.

Un "caso particular", recoñecen, é o dos menores. Nestes momentos son 290 menores os que contan coa axuda que presta Cáritas, cunha media de idade de 8,5 anos. Nestes casos, á problemática do confinamento súmase que a gran maioría destes nenos usaban a diario os comedores escolares.

Na situación actual, cos menores en casa, "increméntanse os gastos de alimentación, á vez que se reducen os ingresos familiares", lembran desde Cáritas.

ALCOHÓLICOS ANÓNIMOS

A agrupación 'Alcohólicos Anónimos' informou este luns de que, a pesar das medidas de confinamento, os seus distintos grupos de axuda continúan activos para dar apoio ás persoas afectadas por esta adicción.

A través dun comunicado, a entidade explicou que os grupos "seguen funcionando facendo uso das novas tecnoloxías" e tentando que "tanto os compañeiros membros, como as persoas que necesiten axuda ou información, non queden sen apoio, axuda e conforto nestes días tan difíciles".

Para contactar con Alcohólicos Anónimos está a disposición dos interesados o teléfono permanente 24 horas 646 645 119, así como paxínaa web www.alcoholicos-anonimos.org.